सोल । दक्षिण कोरियाले विकास गरेको स्वदेशी अन्तरिक्ष रकेट ‘नुरी’ले बुधबार सफलतापूर्वक उडान भर्दै १५ वटा उपग्रहलाई निर्धारित अन्तरिक्ष कक्षमा पुर्याएको छ। दक्षिण कोरियाको अन्तरिक्ष कार्यक्रमका लागि यो महत्वपूर्ण उपलब्धि मानिएको छ।
नुरीको विकासक्रममा यस अभियानलाई अहिलेसम्मकै जटिल र चुनौतीपूर्ण अभियानका रूपमा हेरिएको थियो। एउटै उडानमार्फत फरक प्रकृति र उद्देश्यका १५ वटा उपग्रहलाई निश्चित समय, क्रम र उचाइअनुसार अन्तरिक्षमा पुर्याउनुपर्ने भएकाले अभियान थप चुनौतीपूर्ण बनेको थियो।
तीन चरणमा विभाजित तरल इन्धनबाट चल्ने नुरी रकेट स्थानीय समयअनुसार बुधबार दिउँसो १२ बजेर २५ मिनेटमा प्रक्षेपण गरिएको थियो। राजधानी सोलबाट करिब ४०० किलोमिटर दक्षिणपश्चिममा रहेको गोहुङ क्षेत्रस्थित नारो अन्तरिक्ष केन्द्रबाट रकेट उडाइएको हो।
प्रक्षेपणपछि नुरीको उडान निर्धारित योजनाअनुसार अघि बढेको थियो। रकेटको पहिलो चरण सफलतापूर्वक अलग भएको थियो भने त्यसपछि बाहिरी आवरण र दोस्रो चरण पनि योजनाअनुसार छुट्टिएका थिए। प्रक्षेपणको करिब १२ मिनेट ३० सेकेन्डपछि तेस्रो चरणको इन्जिन बन्द गरिएको थियो।
त्यसपछि करिब ५७५ किलोमिटर उचाइमा उपग्रहहरूलाई क्रमिक रूपमा निर्धारित कक्षमा राख्ने प्रक्रिया सुरु गरिएको थियो। एउटै उडानबाट धेरै उपग्रहलाई फरक समय र निश्चित क्रममा अन्तरिक्षमा पठाउनुपर्ने भएकाले यस प्रक्रियामा विशेष सावधानी अपनाइएको थियो।
यस अभियानको मुख्य उद्देश्य राष्ट्रिय सुरक्षाका लागि पृथ्वीको अवलोकन गर्ने पाँच वटा साना उपग्रहलाई अन्तरिक्षमा पुर्याउनु थियो। ती उपग्रहहरूलाई करिब ३५ देखि ४० सेकेन्डको अन्तरालमा एक–एक गरी सफलतापूर्वक अलग गरिएको थियो। ती उपग्रहबाट पृथ्वीको सतहको निगरानी तथा विभिन्न भौगोलिक गतिविधिको अध्ययनमा सहयोग पुग्ने अपेक्षा गरिएको छ।
मुख्य पाँच उपग्रहपछि थप १० वटा साना शैक्षिक तथा व्यावसायिक उपग्रहलाई पनि अन्तरिक्षमा पठाइएको थियो। ती उपग्रहलाई दुई–दुई वटाको समूहमा करिब १० सेकेन्डको अन्तरालमा अलग गरिएको थियो।
यसअघि नुरीको चौथो उडानमा एउटा मात्र मुख्य उपग्रह पठाइएको थियो। तर यसपटक एउटै उडानबाट १५ वटा उपग्रहलाई निश्चित क्रम, समय र उचाइअनुसार अन्तरिक्ष कक्षमा पुर्याउनुपर्ने भएकाले अभियानको प्राविधिक जटिलता निकै बढेको थियो।
अभियान पूरा भएपछि नुरीले अन्तरिक्षमा रहेका अन्य वस्तुसँग सम्भावित ठक्कर रोक्न आवश्यक प्रक्रिया पूरा गर्नेछ। त्यसपछि रकेट पृथ्वीको वायुमण्डलमा पुनः प्रवेश गर्ने र घर्षणका कारण नष्ट हुने बताइएको छ।
नुरीको सफल उडानसँगै दक्षिण कोरियाको स्वदेशी अन्तरिक्ष प्रविधि विकास गर्ने क्षमता थप बलियो भएको छ। साथै, बहुउपग्रह प्रक्षेपण तथा आगामी थप जटिल अन्तरिक्ष अभियान सञ्चालनका लागि समेत यस सफलताले आधार तयार गरेको छ।
प्रतिक्रिया