काठमाडौँ । एक वर्षभन्दा कम अवधिमा दुई वटा भीषण रेल दुर्घटना भएपछि स्पेनका यातायातमन्त्री ओस्कार पुएन्तेले पदबाट राजीनामा दिने घोषणा गरेका छन्। पछिल्लो दुर्घटनामा ६९ जनाको मृत्यु हुनुका साथै २०० भन्दा बढी मानिस घाइते भएपछि उनले नैतिक जिम्मेवारी लिँदै पद छाड्ने निर्णय गरेका हुन्।
पछिल्लो दुर्घटना भएको छ दिनपछि राजीनामाको घोषणा गर्दै पुएन्तेले स्पेनजस्तो देशको यातायातमन्त्रीका रूपमा यति गम्भीर दुर्घटनापछि पदमा रहिरहनु उचित नहुने बताएका छन्।
म्याड्रिडमा सांसदहरूलाई सम्बोधन गर्दै उनले भने, ‘दुर्घटना भएको केही मिनेटभित्रै मैले आफ्नो भविष्यबारे निर्णय गरिसकेको थिएँ। स्पेनजस्तो देशको यातायातमन्त्रीले एक वर्षभन्दा कम अवधिमा यति गम्भीर प्रकृतिका दुई दुर्घटना भएपछि पदमा रहिरहनु उचित हुँदैन। दुर्घटनाका कारण फरक भए पनि र त्यसमा मेरो प्रत्यक्ष जिम्मेवारी भए पनि वा नभए पनि मैले पद छोड्नुपर्छ भन्ने लाग्यो।’
अधिकारीहरूका अनुसार पछिल्लो दुर्घटना म्याड्रिड र दक्षिणी क्षेत्र अन्डालुसियालाई जोड्ने उच्च गतिको रेलमार्गमा भएको थियो। मानवीय त्रुटि र कम्प्युटर प्रणालीमा देखिएको गडबडीका कारण दुर्घटना भएको प्रारम्भिक विवरण सार्वजनिक भएको छ।
स्पेनको राष्ट्रिय रेल सेवाले सञ्चालन गरेको एउटा रेलले उच्च गतिमा अर्को रोकिराखिएको रेललाई ठक्कर दिएको थियो। सुरक्षा प्रणालीमा समस्या देखिएपछि उक्त रेलमार्गमा रेल सेवा रोकिएको अवस्थामा दुर्घटना भएको बताइएको छ।
दुर्घटनाबारे प्रतिक्रिया दिँदै पुएन्तेले रातो बत्ती बलिरहेको अवस्थामा पनि रेललाई अघि बढ्न अनुमति दिइएको बताएका थिए। ‘रेललाई अगाडि बढ्न नदिने रातो बत्ती बलिरहेको थियो, तर पनि रेललाई अघि बढ्न अनुमति दिइयो। यस्तो निर्णय कुन परिस्थितिमा लिइयो भन्ने कुरा बुझ्नै नसकिने छ,’ उनले भनेका थिए।
यसअघि गत जनवरीमा अन्डालुसिया क्षेत्रको अदामुज सहरमा दुई वटा उच्च गतिको रेल एकआपसमा ठोक्किँदा कम्तीमा ४१ जनाको मृत्यु भएको थियो। एक वर्षभित्रै भएका दुई गम्भीर दुर्घटनाले स्पेनको रेल सुरक्षा व्यवस्थामाथि प्रश्न उठाएको छ।
पछिल्लो दुर्घटनापछि विभिन्न राजनीतिक दलका नेता तथा यातायात मजदुर युनियनले मन्त्री पुएन्तेलाई राजीनामा दिन दबाब दिएका थिए। दुर्घटना भएकै रात यातायात मन्त्रालयको मुख्यालयबाहिर प्रदर्शनकारी र प्रहरीबीच झडपसमेत भएको थियो। केही प्रदर्शनकारीले प्रधानमन्त्री पेद्रो सान्चेजले पनि राजीनामा दिनुपर्ने माग गरेका थिए।
स्पेनमा आमनिर्वाचन हुन तीन साता मात्रै बाँकी रहेका बेला पुएन्तेको राजीनामा घोषणा भएको हो। उनले आगामी निर्वाचनमा आफू उम्मेदवार नबन्ने पनि बताएका छन्। आवासको बढ्दो मूल्य र उपलब्धतासम्बन्धी विवाद, भ्रष्टाचारका विभिन्न प्रकरण तथा स्थानीय निर्वाचनमा आफ्नो समाजवादी पार्टीले लगातार धक्का बेहोरेपछि प्रधानमन्त्री सान्चेजले निर्धारित समयभन्दा अगाडि नै आमनिर्वाचन घोषणा गरेका थिए।
प्रधानमन्त्री सान्चेजले सामाजिक सञ्जालमार्फत पुएन्तेको निर्णयको प्रशंसा गरेका छन्। पीडितप्रतिको सम्मान र आफ्नो प्रगतिशील राजनीतिक अभियानप्रतिको प्रतिबद्धताका कारण उनले पद छाडेको सान्चेजको भनाइ छ।
‘पुएन्तेजस्ता राजनीतिज्ञले हाम्रो देशको प्रतिष्ठा बढाउँछन् र सबै राजनीतिज्ञ एकै प्रकारका हुँदैनन् भन्ने देखाउँछन्। कोही केवल अरूलाई उपदेश दिन्छन् भने कोही आफ्नो जिम्मेवारी पूरा गर्न सबैथोक त्याग्छन्,’ सान्चेजले लेखेका छन्।
प्रतिक्रिया