राप्रपाले भन्यो- सरकारले विकास बजेट रोकेर ब्याज खायो, ७ दिनभित्र मन्त्रीको जवाफ चाहिन्छ

राष्ट्रिय प्रजातन्त्र पार्टी(राप्रपा) का सचेतक तथा प्रवक्ता ज्ञानेन्द्र शाहीले वास्तविक मिटरब्याज सरकार भएको टिप्पणी गरेका छन्।
बुधबार प्रतिनिधि सभाको बैठकमा बोल्दै सरकारले भएभरको पैसा बैंकमा राखेर ब्याज खाएको आरोप लगाए।

उनले भने, ‘सरकारले अहिलेसम्म चालू खर्च ५१ दशमलब ४६ प्रतिशत, पूँजीगत खर्च २२ दशमलब १५ र व्यवस्थापन खर्च ३७ दशमलब ४१ प्रतिशत मात्रै गरेको छ। भयभएरको असारमा मात्रै खर्च गर्ने, सरकारले अझै ७८ प्रतिशत पूँजिगत खर्च गर्न बाँकी छ। भएभरको पैसा बैंकमा राख्ने र ब्याज खानेरु यसले गर्दा वास्तविक मिटरब्याजी कोही छ भने सरकार हो।’

सरकारी पैसा ढुकुटीमा राखेर विकास निर्माणका काम ठप्प पारिएको उनको भनाइ छ। ‘बैंकमा पैसा राखेर जनतालाई अलमल पार्ने काम नगरियोस्। कर्मचारीले तलब खान पाएका छैनन्। निर्माण व्यवसायीले पैसा पाएका छैनन्। संघीय नियमावली अनुसार ७ दिनभित्र मन्त्रीबाट जवाफ चाहिन्छ, नत्र हामी संसदमा खडा हुन्छौं’ उनले भने।