सन्दीपको ३ उत्कृष्ट विकेटमा सर्रे जागुएर्सको जित
ग्लोबल टी-२० क्यानडा क्रिकेटमा नेपाली लेगस्पीनर सन्दीप लामिछानेले उत्कृष्ट प्रदर्शनलाई निरन्तरता दिंदै मिसिसाउगा प्यान्थर्सविरुद्ध तीन विकेट लिएका छन् ।
शुक्रबार राति भएको खेलमा सर्रे जागुएर्सले प्यान्थर्सलाई ५५ रनले पराजित गर्दै लिगमा दोस्रो जित निकालेको छ । टस हारेर पहिले ब्याटिङ गरेको सर्रे जागुएर्सले जतिन्दर सिंहको अर्धशतकमा ६ विकेट गुमाएर १६४ रन बनाएको थियो । जतिन्दले ४५ बलमा ५ चौका र १ छक्का प्रहार गरी ५७ रन बनाए । एलेक्स हाल्सले ३९ र लिट्टन दासले २५ रन बनाए । प्यान्थर्सका जहुर खानले तीन विकेट लिए ।
१६५ रनको लक्ष्य पछ्याएको प्यान्थर्स १७ ओभरमै १०९ रनमा अलआउट भए । प्यान्थर्सका लागि क्यामरुन डेलपोर्टले ३३ तथा श्रेयास मुभ्भाले ३१ रन बनाए । प्यान्थर्सलाई अलआउट गर्न सर्रे जागुएर्सका सन्दीपले तीन ओभरमा १८ रन खर्चेर ३ विकेट लिए । यस्तै स्पेन्सर जोन्सनले ४ ओभरमा २५ रन खर्चेर २ विकेट लिए । म्याथ्यु फोर्डले २ विकेट लिए । दोस्रो जितपछि चार खेलबाट ५ अंक जोडेर सर्रे तेस्रो स्थानमा उक्लेको छ।