बालेनले गरे सांसदको घरबाट बालिकाको उद्दार, प्रहरी परिसर टेकुमा उजुरी दर्ता

काठमाडौं– काठमाडौं महानगरको टोलीले गणतन्त्र दिवसको दिन उद्दार गरेको बालिका लुम्बिनीको प्रदेशसभा सांसदको घरमा बाल श्रमिकको रुपमा रहेको खुलेको छ । लुम्बिनी प्रदेशसभाकी सांसद रेखा कुमारी शर्माको धुम्बाराहिस्थित घरबाट विशेष सूचनाको आधारमा १४ वर्षीय बालिकाको उद्दार गरेको महानगरपालिकाले जनाएको छ ।

धुम्बाराहिबाट १४ बर्षे बालिकालाई दुर्व्यवहार र बाल श्रम शोषणमा परेको अवस्थामा महानगरपालिकाले उद्दार गरेको हो । लठ्ठी र पाइपले कुटपिट हुने गरेको भन्ने उजुरीको आधारमा उनको उद्दार भएको थियो । काठमाडौँमा राखेर पढाइदिने भन्दै सांसद शर्माले बालिकालाई काठमाडौं ल्याएकी थिइन्। कक्षा ७ मा अध्ययनरत बालिका विगत ८ वर्षदेखि सांसद शर्माको घरमा बाल श्रमिकको रुपमा बस्दै आएकी थिइन् । बालिका मानसिक अवस्था स्वस्थ नरहेको महानगरले जानकारी दिएको छ ।

सांसद शर्मा विरुद्ध बुधबार महानगरको टोलीले प्रहरी परिसर टेकुमा बालबालिकासम्बन्धी कसुरअन्तर्गत समेत दर्ता गरेको छ । अब कानुनी प्रक्रियामा जाने महानगरपालिकाले जनाएको छ ।

सांसद शर्माको घरबाट बालिकाको उद्दार गरेपछि काठमाडौंका मेयर बालेन्द्र शाह बालेनले उच्चपदस्थ कर्मचारीले नै बालश्रम शोषण गर्ने गरेको बताएका थिए । महानगरकै क्यान्टिनदेखि सरकारी उच्चपदस्थ कर्मचारी, बालबालिकाकै लागि काम गर्ने भनिएका अन्तराष्ट्रिय निकाय र सांसदसम्मको घरबाट निकृष्टरूपमा बालश्रम शोषण गराइरहेको उनले खुलाएका थिए । यस्तै बुधबार विश्व बाल श्रमविरुद्धको दिवसमा पनि महानगरपालिकाले सिंहदरबारका क्यान्टिङबाट ४ जना बाल श्रमिकको उद्दार गरेको छ ।

२०८१ वैशाखदेखि बालश्रम शोषणमा परेका बालबालिकाको उद्धार गर्न थालेको महानगरपालिकाले उच्चपदस्थ व्यक्तिकै घर र सरकारी कार्यालयका क्यान्टिङबाट ४१ बालबालिकाको उद्दार गरिसकेको छ । महानगरले ती बालबालिकालाई जोखिमबाट उद्धार गरि विभिन्न ६ वटा संरक्षण गृहहरुमा राखेको छ ।