विद्यालयलाई मायाप्रेम गर्ने थलोको रुपमा प्रस्तुत गरिएको भन्दै बद्री पंगेनीको गीत हटाउन माग

काठमाडौं– केहीदिन अघि युट्युबमा सार्वजनिक भएको ‘बसे है पालेदाइ’ विवादित बनेको छ । गीतमा विद्यालयलाई मायाप्रेम गर्ने थलोको रुपमा प्रस्तुत गरिएको भन्दै विरोध भइरहेको छ ।

गीतमा स्कुललाई मायाप्रेम गर्ने थलोको रुपमा चित्रित गरिएको भन्दै कास्कीको अन्नपूर्ण गाउँपालिकाका शिक्षक संघ–संगठनहरुले प्रतिबन्ध लगाउन माग गरेका छन् । अन्नपूर्ण गाउँपालिकाको नेपाल राष्ट्रिय शिक्षक संगठन, नेपाल शिक्षक संघ र एकीकृत अखिल नेपाल शिक्षक संगठनले संयुक्त विज्ञप्ति जारी गर्दै गीतलाई युट्युब लगायत प्लाटफर्मबाट हटाउन माग गरेका छन् ।

‘विद्यालय जस्तो ज्ञानको मन्दिरलाई मायाप्रेम गर्ने थलोका रुपमा चित्रण गर्दै नेपाली राष्ट्रिय गानको अपमान गरी राष्ट्रिय गान गाएको अवस्थामा गरिएका विभिन्न हर्कत खेदजनक रहेको विज्ञप्तिमा उल्लेख छ। ‘शिक्षकहरुलाई अपमानित हुने गरी राखिएका टुक्का, विद्यालयमा गरिएको छायांकन, विद्यालय कर्मचारीप्रति काम नगरी जागिर खाने र कार्यालयभित्र शिक्षकलाई अमर्यादित सोच राख्ने मान्छेको रुपमा चित्रण साथै विद्यार्थीले विभिन्न भाषामा अभिवादन गर्दा शिक्षकले भौतिक सजाय दिएको जस्ता अपाच्य दृश्यले विद्यालय शिक्षाप्रति नै नकारात्मक भाव प्रकट गरेको छ,’ विज्ञप्तिमा भनिएको छ ।

विद्यार्थीहरुले स्कुलभित्रै शिक्षकमाथि अनादर गरेका दृश्यले विद्यार्थीको मानसिकतामा नकारात्मक प्रभाव पार्ने कुरामा समेत उक्त गीतले कुनै ख्याल नगरेको शिक्षक संगठनहरुको भनाइ छ । व्यापारलाई मात्र केन्द्रमा राखी शिक्षा, समाज र साहित्यको कुनै गरिमाको ख्याल नगरी गीत सार्वजनिक गरेको भन्दै उनीरुले तत्काल प्रतिवन्ध गर्न माग गरेका छन् । युट्युब लगायत सम्पूर्ण मिडियाबाट उक्त गितलाई हटाउन शिक्षक संगठनको माग छ ।
‘हाम्रो मागलाई बेवास्ता गरेमा गीतलाई बहिष्कार गर्दै गीतसँग सम्बन्धित कलाकारहरूलाई सामूहिक बहिष्कारसमेत गरिने व्यहोरा जानकारी गराउँदै यसबाट पर्ने क्षतिको जिम्मेवार स्वयम् गीतसँग सम्बन्धित व्यक्ति नै हुने समेत यसै विज्ञप्तिमार्फत जानकारी गराउँदछौँ ।’ विज्ञप्तीमा उल्लेख छ ।

तीन दिनअघि सार्वजनिक भएको ‘बसे है पालेदाइ’ मा बालकृष्ण श्रेष्ठको शब्द तथा स्वर्गीय जयनन्द लामाको संगीत छ । गीतमा बद्री पंगेनी, चोलेन्द्र पौडेल, माया गुरुङ, सुमन परियार, रवि कार्की, श्याम राना, बालकुमार श्रेष्ठ, सुमित्रा कोइराला, अस्मिता डल्लाकोटी र बालिका तामाङको स्वर छ ।