बडिगाडमा पहिरोका कारण आठ जनाको मृत्यु, घाइतेलाई हेलिकप्टरमार्फत उद्धार गरिँदै

बागलुङ– बडिगाड गाउँपालिकामा पहिरोमा परेर ८ जनाले ज्यान गुमाएका छन् । बडिगाड १० दर्लिममा ६ जना र वडा नम्बर ९ को बलघाँसमा २ जना गरी आठ जनाको पहिरोमा परेर मृत्यु भएको हो ।

बडीगाड गाउँपालिका १० मा घरगोठ बगाउँदा ६ जनाको मृत्यु भएको छ । ७ वर्षीया मालती बुढा, ७ वर्षीया मधु बुढा, सञ्जु विककी ६ महिने नाबालिका छोरी, १३ वर्षीय मनोज बुढा, अन्दाजी १२÷१३ वर्षका अमन बुढा र ५९ वर्षीय मैतीदेवी विकको मृत्यु भएको हो ।

यसैगरी पहिरोमा संगीता बुढा, सुमित्रा विक, सीता थापा र मंगलसिंह बुढा घाइते भएका छन् । उता वडा नम्बर ९ मा पहिरोकै कारण १५ वर्षीय विधान परियार र गंगा विकको मृत्यु भएको छ ।

घाइतेहरुलाई उद्धार गर्न जिल्ला सदरमुकामबाट हेलिकोप्टर पठाउन लागिएको बागलुङका सहायक प्रमुख जिल्ला अधिकारी चित्रांगत बरालले जानकारी दिएका छन् ।