कोटीहोममा सम्बोधन गरेका कृष्ण दमाईलाई दुईछाक टार्न समस्या, युकेबाट इशा गुरुङको सहयोग

काठमाडौं– केही दिनअगाडि पशुपति कोटी होमको व्यासासनमा बसेर चर्चामा आएका कृष्ण दमाई एउटा अन्तरवार्तामा धरधरी रोएका छन् । संस्कृतमा आचार्यसम्मको अध्ययन गरेका दमाईको उक्त भिडिओ भाइरल भइरहेको छ ।

जहाँ उनले रुँदै आफूलाई दुई छाक टार्न समस्या भइरहेको बताएका छन् । उनले अन्तर्वार्तामा भनेका छन्, ‘बिहान खाए बेलुका के खाने भन्ने समस्या छ ।’

सो भिडियो भाइरल भएपछि उनलाई सहयोग समेत मिल्न थालेको छ । बेलायतमा रहेर नेपालमा समाज सेवा गर्दै आएकी समाजसेवी इशा गुरुङले उनलाई सहयोग गरेकी छिन् । उनले दमाईलाई बिस हजार रुपैयाँले सहयोग गरेकी हुन् ।

लामो समयदेखि बेलायत बस्दै आएकी उनले प्राकृतिक प्रकोप,बाढीपहिरो,आगलागी,भोकमरी जस्ता समस्याहरुमा परेका नेपालीहरुलाई उनले सशक्त रुपमा सहयोग गर्दै आएकी छिन् । आर्थिक अभावका कारण उपचार गर्न नसकिरहेका क्यान्सर,मृगौला पिडित,ब्लड मणी संकलन र देश विकासमा सामाजिक स्तरबाट उठेको सबै परियोजनामा उनले आर्थिक,भौतिक तथा मानसिक रुपमा समेत सहयोग गर्दै आएकी छिन् ।

उनले कृष्ण दमाईको परिवार पाल्न समस्या भएपछि सहयोग गरेकी हुन् । दमाईलाई अन्य समाजसेवीहरुको समेत सहयोग मिल्न थालेको छ । कोटिहफम महायज्ञका संकल्पकर्ता बालयोगेश्वर विजय कृष्णमूर्ति महाराजले पनि उनलाई एक लाख रुपैयाँ सहयोग गरेका छन् ।

संस्कृतमा आचार्यसम्मको अध्ययन पछि दमाई एक सामुदायिक विद्यालयमा शिक्षण गर्दै आएका छन् । उनी जनक्रान्ति नामको दैनिक पत्रिकामा समेत आबद्ध छन् । तर सामुदायिक विद्यालयमा पढाएपछि निजी स्रोतको शिक्षक भएकाले उनले तलब थोरै छ ।

दमाईको पैतृक सम्पत्ती खासै छैन । उनको श्रीमती र दुई सन्तान छन् । सस्कृत साहित्य र भाषामा अध्ययन गरेपनि उनले आध्यात्मिक क्षेत्रमाखासै अवसर पाएका छैनन् । उक्त अध्ययनले मात्र कर्मकाण्ड र पुराणवाचन गर्न सकिँदैन । पुराणवाचनका लागि छुट्टै कोर्सहरु हुन्छन् । उनले कोटी होममा पनि प्रवचन नभइ सामान्य सम्बोधन मात्रै गरेका थिए । उनको सम्बोधनलाई धेरैले छुवाछुतविरोधी अभियानमा एउटा कोसेढुंगा मानेका छन् ।