एआई र चुनावी बहसमा तयारी बढाउन डेमोक्रेटिक उम्मेदवारलाई ओबामाको दबाब

न्युयोर्क । अमेरिकामा सन् २०२८ को राष्ट्रपतीय निर्वाचनलाई लक्षित गर्दै डेमोक्रेटिक पार्टीभित्र कृत्रिम बुद्धिमत्ता (एआई) सम्बन्धी नीति बहस तीव्र बन्दै गएको छ । यसबीच पूर्वराष्ट्रपति बाराक ओबामा सम्भावित राष्ट्रपतीय उम्मेदवारहरूलाई एआईको प्रभाव र नियमनबारे थप गम्भीर तयारी गर्न आग्रह गरिरहेका छन् ।

सीएनएनका अनुसार ओबामा प्रत्यक्ष रूपमा कुनै सम्भावित उम्मेदवारको पक्षमा उभिएका छैनन् । तर उनले डेमोक्रेटिक नेताहरू, एआई कम्पनीका प्रमुख, विज्ञ तथा आफ्ना पूर्वसहयोगीसँग नियमित छलफल गर्दै एआईसम्बन्धी नीतिगत तयारीबारे चासो राखिरहेका छन् ।

सम्भावित उम्मेदवारहरूले एआईका सम्भावित प्रभावबारे अध्ययन भइरहेको र नीति निर्माणको तयारी गरिरहेको बताउँदै आए पनि ओबामाले आफूले सुनेका कतिपय योजना समस्याको दायराअनुसार पर्याप्त नभएको धारणा राख्दै थप विस्तृत तयारीमा जोड दिएका छन् ।

ओबामाका वरिष्ठ सल्लाहकार एरिक सुल्ट्जका अनुसार पूर्वराष्ट्रपतिले एआईको विकास र प्रयोगबारे तथ्यमा आधारित तथा सूचनामूलक बहस आवश्यक ठानेका छन् । एआईले अमेरिकी अर्थतन्त्र र लोकतन्त्रमा पार्ने प्रभाव प्रविधिको विकासले मात्र नभई सरकारले गर्ने नीतिगत निर्णयले समेत निर्धारण गर्ने उनको धारणा रहेको सुल्ट्जले बताएका छन् ।

एआई कम्पनीका प्रमुखसँग संवाद

ह्वाइट हाउस छाडेको लामो समय बितिसक्दा पनि ओबामा डेमोक्रेटिक पार्टीका नयाँ पुस्ताका नेताहरूसँग सम्पर्कमा छन् । उनले क्यालिफोर्निया भ्रमणका क्रममा, वासिङ्टनस्थित कार्यालयबाट तथा टेलिफोनमार्फत एआई क्षेत्रका प्रमुख व्यक्तिहरूसँग छलफल गर्दै आएका छन् ।

ओबामाले ओपनएआईका प्रमुख साम अल्टम्यान तथा गुगल र एन्थ्रोपिकका कार्यकारीहरूसँग समेत कुराकानी गरेका छन् । साथै एआई विज्ञ, अध्येता र आफ्ना पूर्वसहयोगीसँग प्रविधिको विकास, रोजगारी, राष्ट्रिय सुरक्षा तथा गलत सूचना फैलिने जोखिमबारे छलफल गरिरहेका छन् ।

विशेषगरी बालबालिकामाथि एआईमार्फत फैलिन सक्ने गलत सूचनाको प्रभावबारे उनी चिन्तित रहेको जनाइएको छ । पछिल्ला वर्षमा ओबामाले एआईको तीव्र विकासको तुलनामा सरकार र समाज त्यसबाट उत्पन्न हुने परिणाम सामना गर्न पर्याप्त तयार नभएको धारणा व्यक्त गर्दै आएका छन् ।

‘गम्भीर नियामक ढाँचा’मा जोड

ओबामाले एआईका लागि सङ्घीय सरकारले स्पष्ट र गम्भीर नियामक ढाँचा बनाउनुपर्ने धारणा राखेका छन् । खाद्य पदार्थ तथा हवाई यातायातजस्ता क्षेत्रमा सरकारले मापदण्ड निर्धारण गरेझैँ एआईका लागि पनि निश्चित नियम आवश्यक रहेको उनको भनाइ छ ।

तर उनले सन् २०२८ का सम्भावित राष्ट्रपतीय उम्मेदवारलाई कुनै निश्चित एआई नीति वा विधेयकमा प्रतिबद्ध गराउने प्रयास भने गरेका छैनन् । उनको मुख्य जोड एआईको प्रभावबारे स्पष्ट बुझाइ विकास गर्न र भविष्यको नीति निर्माणका लागि पर्याप्त तयारी गर्नमा रहेको छ ।

एआईको राजनीतिक प्रभाव

डेमोक्रेटिक पार्टीका सम्भावित उम्मेदवारहरूका लागि एआई नीति प्राविधिक र आर्थिक विषयमा मात्र सीमित छैन । एआई उद्योगले राजनीतिमा ठूलो रकम खर्च गर्न थालेपछि यसले चुनावी राजनीतिमा समेत नयाँ चुनौती थपेको छ ।

एआईसँग सम्बन्धित बाह्य समूहहरूले सन् २०२६ का निर्वाचनमा ठूलो रकम खर्च गरेर विभिन्न विज्ञापन अभियान सञ्चालन गरिरहेका छन् । यसले सम्भावित उम्मेदवारहरूलाई एआई उद्योगसँगको सम्बन्ध, नियमन र राजनीतिक चन्दाबीच सन्तुलन कायम गर्ने चुनौती दिएको छ ।

रोजगारीदेखि डेटा सेन्टरसम्म बहस

एआईसम्बन्धी बहस रोजगारी, डेटा सेन्टर, विद्युत् तथा पानीको खपत, राष्ट्रिय सुरक्षा र गलत सूचनाजस्ता विषयसम्म विस्तार भएको छ । फेडरल ट्रेड कमिसनकी पूर्वअध्यक्ष लिना खानले एआईबारेको बहसलाई अत्यन्त अमूर्त जोखिममा मात्र सीमित नगरी नागरिकले दैनिक रूपमा भोग्ने प्रभावमा समेत केन्द्रित गर्नुपर्ने बताएकी छन् ।

पूर्ववाणिज्यमन्त्री जिना राइमन्डोले एआईका कारण अमेरिकी श्रम बजारमा आउन सक्ने परिवर्तनबारे उम्मेदवारहरूले अग्रिम योजना बनाउनुपर्ने धारणा राखेकी छन् । यस्तै, सेनेटर मार्क केलीले एआईका कारण रोजगारी तथा पूर्वाधारमा पर्न सक्ने प्रभाव सम्बोधन गर्ने नीतिगत प्रस्ताव अघि सारेका छन् ।

यसरी डेमोक्रेटिक पार्टीभित्र एआई बहस नियमन, रोजगारी, राष्ट्रिय सुरक्षा, ऊर्जा लागत, डेटा सेन्टर, गलत सूचना र राजनीतिक चन्दासम्म फैलिएको छ । यस बहसमा ओबामाले कुनै एकल नीति अघि नसारे पनि सम्भावित उम्मेदवारहरूलाई एआईको तीव्र विकास र त्यसका राजनीतिक तथा सामाजिक प्रभावबारे अहिलेभन्दा गम्भीर तयारी गर्न निरन्तर आग्रह गरिरहेका छन् ।