काठमाडौं । काठमाडौंको प्रमुख पर्यटकीय क्षेत्र ठमेलमा मादक पदार्थ सेवन गरी सार्वजनिक सडकमा होहल्ला तथा झैझगडा गरेको आरोपमा चार जना चिनियाँ नागरिकलाई प्रहरीले नियन्त्रणमा लिएको छ।
काठमाडौं महानगरपालिका–२६ स्थित ठमेलको ‘फायर चोक’ अगाडि मादक पदार्थ सेवन गरी आपसमा विवाद र झैझगडा गरिरहेको अवस्थामा उनीहरूलाई प्रहरीले नियन्त्रणमा लिएको हो।
जिल्ला प्रहरी परिसर काठमाडौंका अनुसार कात्तिक २६ गते राति करिब ११ बजेर १५ मिनेटको समयमा उक्त घटना भएको थियो। सार्वजनिक सडकमा मदिरा सेवन गरी होहल्ला तथा झैझगडा भइरहेको सूचना पाएपछि प्रहरी वृत्त लैनचौरबाट खटिएको टोली घटनास्थल पुगेको थियो।
प्रहरी टोलीले घटनास्थलमा पुगेर झैझगडा गरिरहेका चारै जनालाई नियन्त्रणमा लिएको जिल्ला प्रहरी परिसर काठमाडौंले जनाएको छ।
पक्राउ पर्नेहरूमा २७ वर्षीय ए हाओ, ३३ वर्षीय ए गुई, ३५ वर्षीय सियाओ ले र २९ वर्षीया योङ सोय रहेका छन्। उनीहरू सबै चिनियाँ नागरिक रहेको प्रहरीले जनाएको छ। पक्राउ परेका पुरुषहरूको राहदानी नम्बर भने खुल्न सकेको छैन।
ठमेल क्षेत्र पर्यटक तथा विदेशी नागरिकको बाक्लो आवागमन हुने प्रमुख पर्यटकीय गन्तव्य हो। विशेषगरी साँझ तथा रातिको समयमा पर्यटकको चहलपहल रहने यस क्षेत्रमा सार्वजनिक स्थानमा मदिरा सेवन गरी होहल्ला तथा झैझगडा हुँदा स्थानीय बासिन्दा, व्यवसायी र पर्यटकलाई समेत असहज अवस्था सिर्जना हुन सक्छ।
घटनापछि प्रहरीले चारै जनालाई नियन्त्रणमा लिएर आवश्यक अनुसन्धान अघि बढाएको छ। सार्वजनिक स्थानमा मादक पदार्थ सेवन गरी अशान्ति फैलाएको घटनाका सम्बन्धमा प्रहरी वृत्त लैनचौरले थप अनुसन्धान गरिरहेको जिल्ला प्रहरी परिसर काठमाडौंले जनाएको छ।
प्रहरीले घटनाको थप विवरण तथा आवश्यक कानुनी प्रक्रियाबारे अनुसन्धान गरिरहेको छ।
प्रतिक्रिया