अमेरिकाको लस एन्जलसमा फैलिएको डढेलोले ल्यायो ठूलो विनाश

काठमाडौँ- अमेरिकाको लस एन्जलसमा फैलिएको डढेलोले ठूलो विनाश निम्त्याएको छ। प्यासिफिक प्यालिसेड्स क्षेत्रमा मंगलबार बिहानदेखि आगो फैलिएको थियो र यो क्षेत्र पर्यटकीय दृष्टिकोणबाट पनि प्रसिद्ध छ। डढेलोका कारण १,१०० भन्दा बढी घर जलेका छन् र ५ जनाको मृत्यु भएको छ। लस एन्जलस क्षेत्रको गभर्नर गेभिन न्युजमले यो डढेलोलाई सबैभन्दा विनाशकारी भएको बताएका छन्।

डढेलोको कारण लाखौं मानिस प्रभावित भएका छन्। ३०,००० भन्दा बढी व्यक्ति विस्थापित भएका छन् र २८,००० भन्दा बढी घरमा बिजुली आपूर्ति बन्द भएको छ। विद्यालयहरु पनि बन्द भएका छन्।

डढेलोको नियन्त्रणमा कसरत भइरहेको भए पनि हावाको तीव्रता र आँधीका कारण आगो नियन्त्रणमा ल्याउन कठिनाइ भएको छ। अधिकारीहरुका अनुसार, हावाको वेग ९७ किलोमिटर प्रतिघण्टासम्म पुगेको छ र आगो हरेक पाँच मिनेटमा ठूलो क्षेत्र सखाप पार्दै छ।

डढेलो फैलिएका क्षेत्रबाट उद्धारका प्रयास जारी छन्, र पाँचवटा हेलिकोप्टर र दमकलले आगो निभाउने प्रयास गरिरहेका छन्। तापनि, डढेलोको तीव्रता र जोखिमको कारण उद्धारका प्रयासहरू कठिन भइरहेको छ।

यस क़सका दृश्यमा मानिसहरूको भागाभाग, सवारी साधन छोडेर भाग्ने र डोजर प्रयोग गरेर बाटो खोल्ने स्थिति देखिएका छन्। प्यासिफिक प्यालिसेड्स क्षेत्रका दिग्गज अभिनेताहरू, जस्तै युजिन लेवी, जेम्स उड्स, जेमी ली कर्टिस, मार्क हमिल र म्याण्डी मुर लगायतले पनि आफ्नो घर छाडेका छन्।