काठमाडौँ । नेपाली कांग्रेसको आइतबार सार्वजनिक गर्ने भनिएको प्रतिज्ञापत्र बुधबारका लागि सरेको छ । संशोधित कार्यक्रमअनुसार अब जनकपुरमा आयोजना हुने चुनावी सभामा प्रतिज्ञापत्र सार्वजनिक हुने छ । कांग्रेस प्रवक्ता देवराज चालिसेले आइतबारका लागि पार्टी कार्यालय बिपीनगर सानेपामा तय गरेको प्रतिज्ञापत्र सार्वजनिक कार्यक्रम स्थगित भएको जानकारी दिए । कांग्रेसले ६ गते मधेस प्रदेशको जनकपुरधामबाट चुनावी सभाको सुरूआत गर्दैछ ।
सोही सभामा प्रतिज्ञापत्र सार्वजनिक गरिने उनले बताए । निर्वाचन आयोगले दलहरूलाई फागुन २१ गते हुने प्रतिनिधिसभा निर्वाचनका लागि घोषणापत्र पेस गर्न आइतबारसम्मको समय दिएको छ । कांग्रेस प्रवक्ता चालिसेले निर्वाचन आयोगमा आइतबारै प्रतिज्ञापत्र बुझाइने, तर सार्वजनिक कार्यक्रम भने बुधबार हुने बताए । विशेष महाधिवेशनबाट सभापति निर्वाचित भएपछि गगन थापाले मधेशलाई महत्व दिएका छन् । उनी काठमाडौं ४ छाडेर सर्लाही ४ पुगेका छन् ।
पार्टी सभापति सर्लाहीबाट उम्मेदवार बनेपछि मधेश प्रदेशमा कांग्रेसको पक्षमा जबर्जस्त माहोल तयार भएको छ । बुधबार कांग्रेसले जनकपुरको तिरहुतिया चौरमा बृहत चुनावी सभा गर्दैछ । जसलाई कांग्रेस सभापति थापा, उपसभापति विश्वप्रकाश शर्मासहित वरिष्ठ कांग्रेस नेताहरुले सम्बोधन गर्ने कार्यक्रम छ । आइतबारका लागि तय प्रतिज्ञापत्र सार्वजनिक गर्न सभापति गगन थापा शनिबार साँझ काठमाडौं आउने तय भएको थियो ।
तर शनिबार साँझ कांग्रेसले पार्टी कार्यालय सानेपामा आयोजना हुने प्रतिज्ञापत्र सार्वजनिक कार्यक्रम स्थगित भएको सूचना निकाल्यो । मधेश प्रदेशलाई कांग्रेसले रणनीतिक महत्व दिएको देखिने गरी प्रतिज्ञापत्र पनि जनकपुरमा सार्वजनिक गरिन लागेको बताइन्छ । अहिलेसम्म सबै दलले काठमाडौंमा मात्र चुनावी घोषणापत्र सार्वजनिक गर्दै आएका छन् । तर कांग्रेसले त्यो प्रचलनलाई तोडेको छ ।
प्रतिक्रिया