काठमाडौं । कक्षा १२को नतिजा सार्वजनिक भएपछि विद्यार्थी, अभिभावक र विभिन्न सरोकारवालाले मूल्याङ्कन प्रक्रिया, उत्तरपुस्तिका परीक्षण तथा नतिजाको विश्वसनीयतामाथि प्रश्न उठाएका छन्। त्यसको जवाफस्वरूप मन्त्री पोखरेलले राष्ट्रिय परीक्षा बोर्डले हतारमा नतिजा सार्वजनिक नगरेको दाबी गरेका छन्। उनका अनुसार आवश्यक जनशक्ति थप गरी र अनावश्यक प्रशासनिक प्रक्रिया छोट्याएर नतिजा समयमै प्रकाशित गरिएको हो।
यद्यपि, ठूलो संख्यामा विद्यार्थी अनुत्तीर्ण भएपछि सरकारको तयारी, पाठ्यक्रम, शिक्षण सिकाइको गुणस्तर र परीक्षा प्रणालीमाथि व्यापक बहस सुरु भएको छ। आन्दोलनरत विद्यार्थीहरूले नतिजा पुनरावलोकन र छानबिनको माग गरिरहेका छन्।
यसैबीच शिक्षा मन्त्रालय र पाठ्यक्रम विकास केन्द्र का प्रतिनिधि सम्मिलित समिति गठन गरिएको छ। समितिले उत्तरपुस्तिकाको नमुना परीक्षण, प्राप्ताङ्क तथा डेटा इन्ट्रीको रुजु गरी नतिजा प्रक्रियाबारे उठेका प्रश्नहरूको निष्पक्ष परीक्षण गर्ने बताइएको छ।
शिक्षामन्त्रीले आन्दोलनप्रति सम्मान व्यक्त गर्दै लोकतान्त्रिक ढंगले आफ्ना कुरा राख्न सबैलाई आग्रह गरेका छन्। तर नतिजाप्रति बढ्दो असन्तुष्टि र विद्यार्थीको दबाबका कारण सरकार र राष्ट्रिय परीक्षा प्रणाली दुवैको परीक्षा भइरहेको देखिन्छ।
प्रतिक्रिया