काठमाडौँ । संघीय संसद्को कार्य व्यवस्था परामर्श समितिको बैठकले प्रतिनिधिसभाको बैठक बुधबारदेखि नै सुचारु गर्ने निर्णय गरेको छ। यसअघि असोज २२ गतेका लागि बैठक बोलाउने तयारी भए पनि प्रतिपक्षी दलहरूको आग्रहपछि बैठक अगाडि सारिएको हो।
भोलिको बैठकमा हालैको बाढी, पहिरो र अविरल वर्षाका कारण भएको जनधनको क्षतिप्रति दुःख व्यक्त गर्दै विशेष शोक प्रस्ताव पारित गर्ने कार्यसूची तय गरिएको छ।
सत्तारुढ राष्ट्रिय स्वतन्त्र पार्टीका सचेतक प्रकाशचन्द्र परियारले विपद्को समयमा जनसरोकारका विषय उठाउन संसद् सञ्चालन आवश्यक रहेको बताए। उनले उद्धार र राहतलाई प्रभावित नगर्ने गरी संसदीय प्रक्रिया अघि बढाउनुपर्नेमा जोड दिए।
प्रमुख प्रतिपक्षी नेपाली कांग्रेसकी प्रमुख सचेतक बासना थापाले पनि विपद्का बेला संसद्ले पीडितका समस्या उठाउँदै सरकारलाई नीतिगत दबाब दिनुपर्ने बताइन्।
बाढी–पहिरोका कारण राजमार्ग अवरुद्ध हुँदा दैनिक उपभोग्य वस्तु, पेट्रोलियम पदार्थ र ग्यासको अभाव हुन सक्ने भन्दै दुवै नेताले आपूर्ति व्यवस्था सहज बनाउन सरकारलाई आग्रह गरेका छन्।
साथै, विपद्को मौका छोपेर कालोबजारी, कृत्रिम अभाव र मूल्यवृद्धि नगर्न व्यवसायीहरूलाई आग्रह गरिएको छ। नेताहरूले राहत, उद्धार र बेपत्ताको खोजीमा सरकारलाई सहयोग गर्ने प्रतिबद्धता जनाएका छन्।
प्रतिक्रिया