क्यानडाविरुद्ध रोहित पौडेलको शतक, ओडीआई करियरमा तेस्रो शतकीय पारी

काठमाडौं । नेपाली राष्ट्रिय क्रिकेट टोलीका कप्तान तथा ब्याटर रोहित पौडेलले आईसीसी क्रिकेट विश्वकप लिग–२ अन्तर्गत क्यानडाविरुद्धको खेलमा शतक प्रहार गरेका छन् ।

ओमान क्रिकेट एकेडेमीको मिनिस्ट्री टर्फ–१ मा जारी खेलमा रोहितले १२६ बलमा आफ्नो शतक पूरा गरेका हुन् । शतकीय पारी खेल्ने क्रममा उनले ८ चौका र १ छक्का प्रहार गरे ।

यो रोहितको एकदिवसीय अन्तर्राष्ट्रिय (ओडीआई) क्रिकेट करियरको तेस्रो शतक हो । उनले यसअघि ओडीआईमा १२ अर्धशतकसमेत बनाइसकेका छन् । यस फर्म्याटमा उनको उच्च व्यक्तिगत स्कोर १२६ रन रहेको छ ।

टस हारेर पहिले ब्याटिङ गरेको नेपालले समाचार तयार पार्दासम्म ४७ ओभरको खेल सकिन लाग्दा ५ विकेट गुमाएर २०५ रन बनाएको थियो ।

क्यानडाविरुद्धको शतकसँगै रोहितले नेपाली टोलीको ब्याटिङमा महत्वपूर्ण योगदान दिएका छन् । खेलको अन्तिम नतिजा भने पूरा इनिङ्स र क्यानडाको जवाफी ब्याटिङपछि तय हुनेछ ।