काठमाडौं । भारतले भारतभित्र, भारतबाट वा भारततर्फ सञ्चालन हुने हवाई उडानमा पावर बैंक बोक्न प्रतिबन्ध लगाएको छ। भारतको नागरिक उड्डयन महानिर्देशनालय (डीजीसीए) को एरोनटिकल इन्फर्मेसन सर्कुलरअनुसार मोबाइल पावर बैंकलाई ह्यान्ड ब्यागेज, अन्य ब्यागेज वा कार्गोका रूपमा बोक्न नपाइने व्यवस्था गरिएको छ।
नयाँ व्यवस्थापछि नेपाल एयरलाइन्सले नेपालबाट भारत तथा भारतबाट नेपालतर्फ यात्रा गर्ने यात्रुहरूलाई पावर बैंक नलिई यात्रा गर्न अनुरोध गरेको छ।
नेपाल एयरलाइन्सले सम्बन्धित उडानमा यात्रा गर्ने यात्रुहरूलाई भारतको उड्डयनसम्बन्धी नियम पालना गर्न आग्रह गरेको हो। पावर बैंकसम्बन्धी प्रतिबन्धका कारण विमानस्थलमा सुरक्षा जाँचका क्रममा यात्रुले असुविधा भोग्न नपरोस् भन्ने उद्देश्यले पनि यात्राअघि नियमबारे जानकारी लिन आवश्यक देखिएको छ।
पावर बैंकमा प्रयोग हुने लिथियम ब्याट्रीमा क्षति पुग्दा वा अत्यधिक ताप उत्पन्न हुँदा आगलागीको जोखिम हुन सक्ने भएकाले हवाई सुरक्षाका दृष्टिले यस्ता उपकरणको ढुवानी र प्रयोगलाई विभिन्न देशले नियमन गर्दै आएका छन्।
भारततर्फ वा भारतबाट यात्रा गर्ने यात्रुले उडानअघि सम्बन्धित वायुसेवा कम्पनीसँग पावर बैंक तथा अन्य ब्याट्रीजन्य उपकरण बोक्नेसम्बन्धी पछिल्लो नियमबारे जानकारी लिनु उपयुक्त हुन्छ।
प्रतिक्रिया