बालेनलाई बाँस्कोटाको प्रश्न : भारत भ्रमणमा सीमा विवादको कुरा उठ्छ ?

काठमाडौँ । नेकपा एमालेका नेता गोकुल बाँस्कोटाले प्रधानमन्त्री बालेन शाहको प्रस्तावित भारत भ्रमणमा नेपाल–भारत सीमा विवादको विषय उठ्छ कि उठ्दैन भन्ने प्रश्न गरेका छन्।

आइतबार सामाजिक सञ्जाल फेसबुकमार्फत धारणा सार्वजनिक गर्दै बाँस्कोटाले अर्थमन्त्री स्वर्णिम वाग्लेले हालै दिएको अभिव्यक्तिप्रति आपत्ति जनाएका छन्। उनले वाग्लेको भनाइले राष्ट्रिय हितमा असर पार्न सक्ने भन्दै त्यसलाई राष्ट्रघातको संज्ञा दिएका छन्।

बाँस्कोटाले प्रधानमन्त्री शाहले विगतमा ग्रेटर नेपालको नक्सा सार्वजनिक रूपमा टाँगेको प्रसङ्ग उल्लेख गर्दै भारत भ्रमणका क्रममा सीमा विवादको विषय उठाउने अपेक्षा व्यक्त गरेका छन्। उनले यस विषयमा सरकारको धारणा स्पष्ट हुनुपर्ने आशयसमेत व्यक्त गरेका छन्।

यसैबीच, राष्ट्रिय प्रजातन्त्र पार्टी (राप्रपा) का पूर्वअध्यक्ष कमल थापाले पनि वाग्लेको अभिव्यक्तिप्रति असन्तुष्टि जनाएका छन्। उनले नेपालको राष्ट्रवाद कुनै मुलुकविशेषको विरोधमा आधारित नभएको उल्लेख गर्दै विदेशी मञ्चमा ‘भारतविरोधी राष्ट्रवादको युग सकियो’ भन्नुले राष्ट्रिय सरोकारका मुद्दा कमजोर हुन सक्ने तर्क गरेका छन्।

प्रधानमन्त्री शाहको प्रस्तावित भारत भ्रमणमा सीमा विवादलगायतका विषयले स्थान पाउँछन् वा पाउँदैनन् भन्ने विषयमा भने थप विवरण सार्वजनिक हुन बाँकी छ।