अमेरिका । अमेरिकाको फ्लोरिडा राज्यस्थित टालाहासीमा विश्वविद्यालयको रंगशालानजिक गोली चल्दा ११ जना घाइते भएका छन्। घाइतेमध्ये ६ जना बालबालिका तथा किशोरकिशोरी छन्। उनीहरूमध्ये सबैभन्दा कम उमेरका एक जना ११ वर्षका छन्।
सीएनएनका अनुसार शनिबार राति फ्लोरिडा ए एन्ड एम विश्वविद्यालयको ब्राग मेमोरियल रंगशाला नजिक गोली चलेको हो। घटनामा घाइतेमध्ये एक जनाको अवस्था गम्भीर छ भने तीन जनालाई गम्भीर चोट लागेको छ। अन्य आठ जनाको अवस्था स्थिर रहेको प्रहरीले जनाएको छ।
टालाहासीका प्रहरी प्रमुख लरेन्स रेभेलले पत्रकार सम्मेलनमा घटनाबारे जानकारी दिएका थिए। उनका अनुसार घाइतेमध्ये एक जना विश्वविद्यालयका विद्यार्थी छन्। घटनास्थलबाट भाग्ने क्रममा एक जना घाइतेकी हजुरआमा पनि चोटग्रस्त भएकी छन्।
विश्वविद्यालयको घरेलु मैदानमा भएको फुटबल खेल सकिएको केही घण्टापछि गोलीकाण्ड भएको थियो। उक्त खेलमा अर्कान्सास–पाइन ब्लफ गोल्डेन लायन्सले फ्लोरिडा ए एन्ड एम र्याटलर्सलाई ३१–२८ ले पराजित गरेको थियो। यद्यपि, गोलीकाण्ड र खेलबीच कुनै सम्बन्ध रहेको वा नरहेकोबारे प्रहरीले पुष्टि गरेको छैन।
प्रहरी प्रमुख रेभेलका अनुसार दुईदेखि तीन जनाबीच भएको विवादका कारण घटना भएको हुन सक्ने प्रारम्भिक अनुमान छ। गोली चलाउने व्यक्ति वा व्यक्तिहरूको पहिचान खुलेको छैन। उनीहरूको खोजी भइरहेको प्रहरीले जनाएको छ।
घटनाको अनुसन्धानका लागि प्रहरीको हिंसात्मक अपराध अनुसन्धान इकाई परिचालन गरिएको छ। अनुसन्धानकर्ता, फरेन्सिक विशेषज्ञ तथा अन्य अधिकारीले घटनास्थलबाट प्रमाण सङ्कलन गरिरहेका छन्। गोली चलाउनुको कारण र घटनामा संलग्न व्यक्तिबारे थप विवरण आउन बाँकी छ।
टालाहासीका मेयर जोन डेलीले घटनालाई दुःखद र हृदयविदारक त्रासदी भन्दै पीडित तथा उनीहरूका परिवारप्रति सहानुभूति व्यक्त गरेका छन्। उनले यस कठिन समयमा विश्वविद्यालय परिवारलाई समुदायको साथ रहने बताएका छन्।
फ्लोरिडा ए एन्ड एम विश्वविद्यालयले पनि घटनाप्रति दुःख व्यक्त गर्दै प्रहरीको अनुसन्धानमा सहयोग गर्न सर्वसाधारणलाई घटनास्थल आसपासको क्षेत्रबाट टाढा रहन आग्रह गरेको छ। विश्वविद्यालयका अनुसार क्याम्पस परिसर सुरक्षित छ।
घटनाबारे प्रहरीले अनुसन्धान जारी राखेको छ। गोली चलाउने व्यक्तिको पहिचान र घटनाको वास्तविक कारण खुल्न बाँकी छ।
प्रतिक्रिया