१० वर्षपछि बंगलादेशसँग बदला लिने नेपालको सपना अपुरै, सन्दीप बने टी–२० आईमा सर्वाधिक छिटो १०० विकेट पुरा गर्ने विश्वकै दोस्रो खेलाडी

काठमाडौं– १० वर्षपछि बंगलादेशसँग बदला लिने नेपालको सपना अधुरो भएको छ । १० वर्षपछि विश्वकपको मैदानमा बंगलादेशसँग आमनेसामने भएको नेपाल २१ रनले पराजित भएपछि नेपालको सपना अधुरै भएको हो । वेस्ट इन्डिजको अर्नोस भाले रंगशालामा आइतबार राती अर्थात् नेपाली समयअनुसार सोमबार भएको आईसीसी टी–२० विश्वकप २०२४ को समुह चरणको अन्तिम खेलमा नेपाल २१ रनले पराजित भएको हो ।

यो सँगै नेपाल २०२४ को टी२० विश्वकपमा जित विहीन हुँदै बाहिरिएको छ । बंगलादेश भने ४ खेलमा ६ अंक जोड्दै समूह डी बाट दोस्रो स्थानमा रहँदै सुपर ८ मा पुगेको छ । नेपाल र बङ्गलादेशबिच यसअघि सन् २०१४ को टी–२० विश्वकपमा भेट भएको थियो । त्यतिबेला नेपाल आयोजक बङ्गलादेशसँग आठ विकेटले पराजित भएको थियो । त्यसको जवाफ नेपालले दिने अपेक्षा गरिएपनि नतिजा सोचे अनुरुप आउन सकेन ।

सोमबार टस जितेर फिल्डिङ रोजेको नेपालले बलिङमा बङ्गलादेश विरुद्ध राम्रो प्रदर्शन गरेको थियो । तर, ब्याटिङमा खराब प्रदर्शन गर्दै २१ रनले हार व्यहोर्नुपरेको हो।

१०७ रनको लक्ष्य पछ्याएको नेपाल १९.२ ओभरमा ८५ रनमा अल आउट भयो । नेपालका लागि कुशल मल्लले ४० बलमा १ चौका र १ छक्कासहित २७ रन बनाए । दीपेन्द्रसिंह ऐरीले ३१ बलमा २ चौका र १ छक्कासहित २५ रनमा आउट भए ।

ओपनर आसिफ शेखले १४ बलमा ४ चौकासहित १७, कुशल भुर्तेल ४, अनिल साह शून्य, रोहित पौडेल र सन्दीप जोरा १–१ रनमा आउट भए ।

एक समय नेपाल ७ ओभरमा २६–५ को अवस्थामा पुगेको थियो । दीपेन्द्र र कुशल मल्लले छैटौं विकेटका लागि ५८ बलमा ५२ रनको महत्वपूर्ण साझेदारी गरेका थिए ।

नेपाललाई अन्तिम १२ बलमा जितको लागि २२ रन चाहिँएको थियो । १९ औं ओभरमा मुश्ताफिजुर रहमानले दीपेन्द्रलाई आउट गर्दै मेडन ओभर राखेका थिए । गुलशन झा, सोमपाल कामी र अभिनाश बोहरा शून्यमा आउट हुँदा १९.२ ओभरमा अल आउट हुन पुग्यो ।

बंगलादेशका तान्जिम हसनले ४ ओभरमा १ मेडनसहित ७ रन खर्चेर ४ विकेट लिए । मुश्ताफिजुर रहमानले ४ ओभरमा ७ रन खर्चेर ३ विकेट लिए । सकिब अल हसनले २ र तस्किन अहमदले १ विकेट लिए ।

त्यसअघि टस हारेर पहिला ब्याटिङको निम्तो पाएको बंगलादेश १९.३ ओभरमा १०६ रनमा अल आउट भएको थियो । बंगलादेशका लागि सकिब अल हसनले २२ बलमा २ चौकासहित सर्वाधिक १७ रन बनाए । रिशाद हसनले ७ बलमा १ चौका र १ छक्कासहित १३ रन जोडे ।

ओपनर तान्जिद हसन शून्य, लिटन दास १०, नाज्मुल हसन सान्टो ४, तोव्हीद ह्रिदोय ९, महमुदूल्लाह रियाद १३, जाकेर अली १२ र तान्जिम हसन सकिबले ३ रन बनाए ।

नेपालका लागि सोमपाल कामी, दीपेन्द्र सिंह ऐरी, रोहित पौडेल र सन्दिप लामिछानेले समान २ विकेट लिए । कप्तान रोहितले ४ ओभरमा २० रन खर्चिए । सन्दिपले ४ ओभरमा १ मेडन सहित १७ रन दिए । यस्तै कुशल भुर्तेलले भने ४ ओभरमा २२ रन दिएर कुनै विकेट लिएनन् । १९औं ओभरमा बलिङ गरेका अविनाश बोहोराले १ ओभरमा १० रन खर्चिए ।
योसँगै बंगलादेश ४ खेलमा ६ अंकका साथ दोस्रो स्थानमा रहँदै सुपर ८ मा पुगेको छ । नेपाल ४ खेलमा १ अंकका साथ चौथो स्थानमा रहेर बाहिरिएको छ ।

यसअघि नेपाल नेदरल्यान्ड्ससँग ६ विकेट, दक्षिण अफ्रिकासँग १ रनले पराजित भएको थियो । वर्षाका कारण श्रीलंकासँगको खेल रद्द हुँदा १–१ अंक बाँडेको थियो ।

नेपालले हार व्यहोरेपनि लेग स्पिनर सन्दीप लामिछानेले टी–२० आईमा सय विकेट पुरा गरेका छन् । उनले ५२ खेलमा ९८ विकेट पुरा गरेका थिए । शनिबार दक्षिण अफ्रिकासँग भएको खेलमा कुनै विकेट लिन नसकेका उनले आजको खेलमा दुई विकेट लिँदै सय विकेट पुरा गरेका हुन् ।

सन्दीपले बंगलादेशविरुद्ध चौधौँ ओभरको दोस्रो बलमा तान्जिम अल हसनलाई ३ रन बनाउँदा बोल्ड आउट गराएका थिए । सोह्रौँ ओभरमा १६ औँ ओभरको तेस्रो बलमा बंगलादेशका जाकर अलीको विकेट लिँदै सन्दीपले सय विकेट पूरा गरे । यो सँगै टी–२० आईमा सबैभन्दा छिटो १ सय विकेट लिने सन्दीप विश्वका दोस्रो खेलाडी बनेका छन् । उनले ५४ इनिङमा एक सय विकेट पुरा गरेका हुन् । यसअघि अफगानस्तानका रासिद खानले ५३ खेलमा १ सय विकेट लिएका थिए ।