अस्ट्रेलियाले विदेशी विद्यार्थीका लागि भिसा शुल्क बढाएर दोब्बर भन्दामाथि पुर्यायो
अस्ट्रेलियाले विदेशी विद्यार्थीका लागि भिसा शुल्क बढाएर दोब्बर भन्दामाथि पुर्याएको छ । विदेशीहरूको सङ्ख्या कीर्तिमानी स्तरमा उक्लिएर घर जग्गा बजारमा मूल्य वृद्धि अनियन्त्रित भएकै समयमा सरकारमाथि दबाब बढिरहँदा यो कदम चालिएको छ ।
जुलाई १ देखि अस्ट्रेलिया पढ्न जाने विदेशी विद्यार्थीले भिसा शुल्क बापत १ हजार ६०० अस्ट्रेलियन डलर (१ हजार ६८ अमेरिकी डलर) तिर्नुपर्नेछ भने यसअघि यो शुल्क ७१० अस्ट्रेलियन डलर रहेको थियो । आगन्तुक भिसा र अस्थायी ग्रयाजुएट भिसामा गएका विद्यार्थीलाई अस्ट्रेलियाबाटै विद्यार्थी भिसाका लागि आवेदन दिन पनि रोक लगाइएको छ । यसले विदेशी शिक्षा प्रणालीको अखण्डता ब्यूँताउन र निष्पक्ष, सानो र धान्नसक्ने आप्रवासन प्रणाली बनाउन मद्दत गर्ने अस्ट्रेलियाका गृह मामिला मन्त्री क्लेयर ओ निलले एक विज्ञप्तिमा भनेकी छिन् ।
सन् २०२३ को सेप्टेम्बर २० मा सकिएको एक वर्षमा अस्ट्रेलियामा खुद आप्रवासन ६० प्रतिशतले बढेर ५ लाख ४८ हजार ८०० को कीर्तिमानी स्तरमा उक्लिएको सरकारी तथ्याङ्कले देखाएको छ । भिसा शुल्क बढाइनुको अर्थ अमेरिका र क्यानडाजस्ता देशको तुलनामा अस्ट्रेलियामा पढाई विदेशी विद्यार्थीका लागि निकै महँगो पर्न गयको छ । अमेरिका जान चाहने विद्यार्थीले अहिले विद्यार्थी भिसा शुल्कबापत १८५ डलर तिर्नुपर्छ भने क्यानडामा ११० डलर जति लाग्ने छ । विदेशी विद्यार्थीलाई अस्ट्रेलियामा बसाई अवधि निरन्तर थपिरहन सघाउने भिसा नियममा रहेका छिद्रहरू पनि सबै टालिने सरकारले बताएका छन् ।