कमला नदीमा आएको बाढीमा फसेका ६ जनाको सशस्त्र प्रहरीद्वारा उद्धार
काठमाडौँ – धनुषा-सिरहा जोड्ने कमला नदीमा आएको बाढीमा फसेका ६ जनाको सशस्त्र प्रहरीले सकुशल उद्धार गरेका छन् ।
सिरहाको कल्याणपुर नगरपालिका ६ का ५५ वर्षीय मनिया कापर, ५० वर्षीय सेवक साह, ३७ वर्षीय मोहम्द हाकिम राई र ३५ वर्षीय अलादिन राईलाई सशस्त्र प्रहरीले सकुशल उद्धार गरेका हुन् ।
दाउरा लिन गएको बेला अचानक बाढीको बहाव बढेपछि उनीहरू फसेका थिए । स्थानीयले दिएको जानकारी पाएर सशस्त्र प्रहरी बल नेपाल सुरक्षा वेश कल्याणपुरको टोली नदीमा पुगेर उनीहरूलाई ट्युब बोटको सहयोगले सकुशल उद्धार गरेका छन् ।
बाढीले तटबन्धमा क्षति
कमला नदीको पश्चिमतर्फको तटबन्धमा बाढीले क्षति पुर्याएको छ । धनुषा गणेशमान चारनाथ नगरपालिका ८ देखि सबैला नगरपालिका ४ पटेर्वासम्म तटबन्धमा क्षति पुर्याएको छ ।
तटबन्धमा क्षति पुर्याएपछि धनुषाका प्रमुख जिल्ला अधिकारी रामुराज कडरिया, धनुषाका एसपी भुवनेश्वर तिवारी, सशस्त्रका एसपी दर्शन गिरी, सबैलाका मेयर कारी राम यादवसहितको टोलीले निरीक्षण गरेको छ । क्षतिग्रस्त तटबन्धको मर्मत तथा सुधारको काम तीन दिनभित्रमा सम्पन्न गर्न सम्बन्धित नगरपालिकालाई निर्देशन दिएको प्रमुख जिल्ला अधिकारी कडरियाले जानकारी दिएका छन् ।