नाइजेरियाली युवकले लगातार तीन दिन भिडियो गेम खेलेर राखे विश्व कीर्तिमान

एजेन्सी– २४ वर्षीय नाइजेरियाली युवकले लगातार तीन दिनभन्दा बढी समयसम्म फुटबल भिडियो गेम खेलेर विश्व कीर्तिमान राखेका छन् । ओसाइड ओलुवोले उर्फ ‘कोडेड’ ले ७५ घण्टाको समयसम्म मोबाइलमा फुटबल खेल खेल्दै सबैभन्दा लामो भिडियोगेम म्याराथन प्रदर्शन गरेका हुन् ।

उनले सन् २०२२ मा लगातार ५० घण्टा भिडियो गेम खेलेर डेभिड ह्वाइटफुटले बनाएको कीर्तिमान तोड्दै उनले नयाँ कीर्तिमान राखेका छन् ।

ओसाइड एक योग्य बायोकेमिस्ट हुन् । उनी कार डिलरको रूपमा काम गर्छन् । आफ्नो गृहनगर इजेबु ओडेको स्थानीय अस्पतालको लागि चन्दा उठाउन उनले सबैभन्दा लामो भिडियो गेम खेलेर विश्व कीर्तिमान बनाउने प्रयास गरेका थिए ।

सन् २०१० मा पहिलोपटक भिडियोगेम म्याराथुनको पहिलो किर्तीमानी राखिएको थियो । २४ घण्टाको समयमा भिडियो गेम खेलेर कीर्तिमान राखेकोमा त्यस रेकर्डलाई सात पटक तोडिएको छ । ११ वर्षमा सात पटक उक्त कीर्तिमान तोड्दै ५० घण्टासम्मको किर्तीमान बनेको थियो ।

अघिल्ला सात रेकर्ड राख्ने खेलाडीहरुले फिफा वा प्रो इभोलुसन फुटबल खेलेका थिए । तर ओसाइडले आफ्नो आईफोनमा मोबाइल गेम ड्रीम लीग सकर २०२४ खेले । उनको मोबाइल टिभी स्क्रिनमा कनेक्ट गरिएको थियो ।

उनले उक्त गेम २०१६ बाट खेल्न थालेका थिए । उनले विश्व कीर्तिमान राख्न ५०० भन्दा बढी खेल खेलेका छन् । उनले गिनिज वल्र्ड रेकर्डको नियमअनुसार हरेक एक घण्टामा पाँच मिनेट विश्राम लिन पाएका थिए । त्यही समयमा उनले खाने, शौचालय जाने र एकैछिन सुत्ने काम गरेका थिए । विश्व कीर्तिमान राखेपछि ७५ घण्टासम्म खेल्दा आफुलाई रमाइलो भएको उनले बताए ।