झाँक्री भुजेलको गाडीको ठक्करबाट ज्यान गुमाएका नगरकोटीको गर्भवती श्रीमतीको पनि मृत्यु, ५२ लाख क्षतिपूर्ती दिने सहमती

काठमाडौं– झाँक्री प्रकाश भुजेलले चलाएको गाडीको ठक्करबाट ज्यान गुमाएका नारायण नगरकोटीकी श्रीमतीको पनि मृत्यु भएको छ ।

कात्तिक २८ गते काठमाडौंको इन्द्रायणीमा झाँक्री भुजेलले चलाएको गाडीले मोटरसाइकललाई ठक्कर दिएको थियो । उक्त दुर्घटनाबाट गम्भीर घाइते भएका कागेश्वरी मनोहरा नगरपालिका–२ घर भएका नारायण नगरकोटीको उपचारका क्रममा निधन भएको थियो । दुर्घटनामा गम्भीर घाइते भएकी नगरकोटीकी श्रीमती सानुमायालाई भेन्टिलेटरमा राखेर उपचार भइरहेको थियो ।

उनको शुक्रबार नै निधन भएको प्रहरी स्रोतले जनाएको छ । सानुमायाको निधनपछि उनको शवको पोष्टमार्टम गर्दा गर्भमा तीन महिनाको भ्रुण रहेको पनि पुष्टि भएको थियो । आमासँगै कोखको शिशुको पनि निधन भएको छ ।

यता झाक्री भूजेल र नगरकोटी परिवारबीच दुई पक्षबीच ५२ लाख रुपैयाँ क्षतिपूर्ती दिने कुरामा सहमती भएको छ । क्षतीपूर्ती सोमबार शव उठाउने सहमति भएको हो । उनीहरुबीचको मध्यस्थता जिल्ला प्रहरी परिसर भद्रकालीले गरेको थियो । पहिला मृतक परिवारले प्रतिव्यक्ति ५० लाखका दरले एक करोड क्षतीपूर्ति माग गरेका थिए । निरन्तरको वार्ता र स्थानीय जनप्रतिनिधिहरूको मध्यस्थतापछि ५२ लाख क्षतिपूर्ती दिने सहमति भएको थियो ।

भुजेल अहिले भद्रकालीस्थित जिल्ला प्रहरी परिसरको हिरासतमा छन् । उनीविरुद्धको प्रहरी वृत्त बौद्धले सवारी तथा यातायात ऐन २०४९ को सवारी ज्यानको महलमा मुद्दा चलाएको छ ।

ऐनको दफा १६१ को उपदफा ३ बमोजिम उनीविरुद्ध मुद्दा पेश गर्ने प्रहरीको तयारी छ । त्यसअनुसार उनलाई एक वर्षभन्दा बढी कैद सजाय हुनसक्नेछ ।