क्षमताभन्दा बढी यात्रु बोकेर गाडी दुर्घटना भए त्यसको जिम्मेवार प्रहरी

काठमाडौं– अब क्षमताभन्दा बढी यात्रु वा सामान बोकेर सवारीसाधन दुर्घटनामा परे त्यसको जिम्मेवार दुर्घटना भएको स्थान नजिकैको प्रहरी इकाई प्रमुख जिम्मेवार हुने भएका छन् ।

पछिल्लो समय स्थानीय स्तरमा घातक दुर्घटना बढेका छन् । प्रहरी चेकजाँच राम्रोसँग नहुँदा त्यसको फाइदा उठाउँदै बढी लोड बोक्ने र नियमित रुपमा सवारीसाधन जाँच नगर्ने हुँदा दुर्घटना दोहोरिने गरेको छ ।

अब भने प्रहरीको लापरबाहीका कारण सवारीसाधन दुर्घटनाग्रस्त भए त्यसको विभागीय जिम्मेवारी स्थानीय प्रहरी इकाई प्रमुखले लिनुपर्ने भएको छ ।

उक्त निर्णयलाई कार्यान्वयनमा ल्याउन गृह मन्त्रालयले भौतिक पूर्वाधार तथा यातायात मन्त्रालय र नेपाल यातायात व्यवसायी महासंघलाई परिपत्रसमेत गरिसकेको छ ।

अब स्थानीय स्तरमा सवारीसाधनले क्षमताभन्दा बढी यात्रु बोकेको पाइए स्थानीय प्रहरीले कडाइसाथ कारबाही गर्नुपर्ने गृहमन्त्रालयले जनाएको छ ।

यसका साथै एउटै चालकले लामो दुरीको यात्रा तय गर्ने, सार्वजनिक सवारीसाधनमा यात्रुलाई टिकट नलिई यात्रा गराउने, तीव्र गतिमा सवारीसाधन चलाउने, नियमित रूपमा सवारीसाधनको यान्त्रिक स्थिति र स्वरूपको परीक्षण भए–नभएको लगायत प्रचलित सवारी तथा यातायात सम्बन्धी प्रचलित कानुनमा उल्लेख विषयमा समेत प्रहरीले नियमित जाँच गर्ने निर्णय गरेको छ ।