फरार भनिएका रामबहादुर बम्जन पुगे जेल, यस्तो छ कारण

काठमाडौं । ‘लिटिल बुद्ध’ भनेर चिनिएका विवादास्पद धर्मगुरु रामबहादुर बम्जन पुर्पक्षका लागि कारागार चलान भएका छन् । उनलाई सम्पत्ति शुद्धीकरण मुद्दामा सर्लाही जिल्ला अदालतले पुर्पक्षमा कारागार चलान गर्न आदेश दिएको हो ।

न्यायाधीश जीवनकुमार भण्डारीको इजलासले बम्जनलाई पुर्पक्षका लागि थुनामा पठाउने आदेश गरेको सर्लाही जिल्ला अदालतका सूचना अधिकारी सिकिन्दर कापरले जानकारी दिए । सोमबार साँझ प्राप्त अदालतको आदेशबमोजिम बम्जनलाई राति नै सर्लाही सदरमुकामस्थित मलंगवा कारागार चलान गरिसकिएको जिल्ला प्रहरी कार्यालयले जनाएको छ ।

सर्लाही जिल्ला अदालतका सूचना अधिकारी कापरका अनुसार सम्पत्ति शुद्धीकरण कसुरमा विवादित धर्मगुरु बम्जनमाथि गएको फागुन ५ गते अदालतमा मुद्दा दर्ता भएको थियो । बम्जनविरुद्ध यसअघि सर्लाही जिल्ला अदालतले अनुयायी अर्थात् आनीमाथिको यौन दुराचार मुद्दामा २०८१ असार १० गते १० वर्ष कैद र पाँच लाख रुपैयाँ क्षतिपूर्तिको सजाय तोकेको थियो । उच्च अदालत जनकपुरले गएको चैत ६ गते सर्लाही जिल्ला अदालतको फैसला उल्ट्याउँदै बम्जनलाई कारागारमुक्त गरेको थियो । कारागारमुक्त भएलगत्तै बम्जन फरार भएका थिए ।

बम्जनलाई सम्पत्ति शुद्धीकरण मुद्दामा सर्लाही जिल्ला अदालतले पुनः कारागार चलानको आदेश दिएको हो । मुद्दा सुनुवाइको क्रममा विवादित धर्मगुरु बम्जन सर्लाही जिल्ला अदालतमा आउँदा सोमबार दिनभर सदरमुकाम मलंगवामा ठूलो संख्यामा उनका अनुयायी भेला भएका थिए ।