काठमाडौं । नेपाल प्रिमियर लिग (एनपीएल) को साविक विजेता लुम्बिनी लायन्सले आगामी सिजनको तयारीलाई तीव्र बनाउँदै बिराटनगरका सन्देश कटुवाललाई प्रमुख कार्यकारी अधिकृत (सिइओ) नियुक्त गरेको छ।
नेपाली क्रिकेटको फ्रेन्चाइज व्यवस्थापनमा अनुभव बटुलेका कटुवाल यसअघि एनपीएलकै काठमाडौं गोर्खाजको सिइओका रूपमा कार्यरत थिए। गोर्खाजमा रहँदा उनले टोलीको प्रशासनिक व्यवस्थापन, व्यावसायिक साझेदारी, ब्रान्डिङ, मार्केटिङ तथा प्रतियोगितासम्बन्धी समन्वयमा महत्वपूर्ण भूमिका निर्वाह गरेका थिए। अब उनी लुम्बिनी लायन्सको व्यवस्थापकीय नेतृत्व सम्हाल्दै क्लबको व्यावसायिक विस्तार, रणनीतिक योजना, प्रायोजन व्यवस्थापन तथा संस्थागत विकासका कार्यको नेतृत्व गर्नेछन्।
कटुवालको नियुक्तिसँगै क्लबले व्यवस्थापन पक्षलाई अझ प्रभावकारी बनाउने अपेक्षा गरेको छ। पछिल्ला वर्षहरूमा नेपाली फ्रेन्चाइज क्रिकेटमा बढ्दो प्रतिस्पर्धाबीच बलियो व्यवस्थापन, प्रभावकारी ब्रान्डिङ र व्यावसायिक रणनीतिले टोलीको सफलतामा महत्वपूर्ण भूमिका खेल्ने भएकाले उनको अनुभव लुम्बिनीका लागि उपयोगी हुने विश्वास गरिएको छ।
यता, गत सिजन लुम्बिनी लायन्सकी सिइओ रहेकी भावना घिमिरे यसपटक कार्यकारी निर्देशक (एक्जिक्युटिभ डाइरेक्टर) को भूमिकामा रहनेछिन्। उनले क्लबको दीर्घकालीन योजना, संस्थागत विकास, साझेदारी विस्तार तथा समग्र सञ्चालनमा नेतृत्वदायी भूमिका निर्वाह गर्ने जनाइएको छ।
लुम्बिनी लायन्सले गत संस्करणमा उत्कृष्ट प्रदर्शन गर्दै नेपाल प्रिमियर लिगको उपाधि जितेको थियो। उपाधि विजेता टोलीका रूपमा आगामी सिजन पनि सफलता दोहोर्याउने लक्ष्यसहित क्लबले खेलाडी व्यवस्थापनदेखि प्रशासनिक संरचनासम्म विभिन्न क्षेत्रमा तयारीलाई अघि बढाइरहेको छ।
सिइओमा सन्देश कटुवालको नियुक्ति र भावना घिमिरेको कार्यकारी निर्देशकमा जिम्मेवारी परिवर्तनसँगै लुम्बिनी लायन्सले मैदानभित्रको प्रदर्शनसँगै मैदानबाहिरको व्यावसायिक र संस्थागत क्षमतासमेत थप मजबुत बनाउने संकेत दिएको छ।
प्रतिक्रिया