काठमाडौँ । रसुवाको भोटेकोसीमा आएको भीषण बाढी त्रिशूली नदी हुँदै तलतर्फ बढेपछि नदी तटीय क्षेत्रमा जोखिम उच्च बनेको छ।
बाढी पूर्वानुमान महाशाखाले भदौ १० गते बिहान १०:२८ बजे जारी गरेको अपडेटअनुसार बाढी धादिङको गल्छी आसपास आइपुगेको छ। महाशाखाका अनुसार बाढी अबको केही घण्टामा मुग्लिन पार गर्ने अनुमान गरिएको छ।
बाढीको सम्भावित जोखिमलाई मध्यनजर गर्दै महाशाखाले पृथ्वी राजमार्ग तथा मुग्लिन–नारायणगढ सडकखण्ड आसपासका नदी तटीय बस्ती र बजार क्षेत्र खाली गर्न आग्रह गरेको छ।
त्रिशूली नदीमा बाढीको बहाव बढ्दै गएकाले नदी आसपासका क्षेत्रमा थप क्षति हुन सक्ने भन्दै स्थानीय बासिन्दालाई उच्च सतर्कता अपनाउन भनिएको छ।
महाशाखाले त्रिशूली नदी छेउछाउका बस्ती तथा बजार क्षेत्रका बासिन्दालाई सुरक्षित स्थानमा सर्न र जोखिमयुक्त क्षेत्रमा नजान आग्रह गरेको छ।
यसैबीच, बाढीको प्रभाव बढ्दै गएपछि स्थानीय प्रशासन, सुरक्षा निकाय तथा सम्बन्धित निकायलाई सम्भावित उद्धार र राहतका लागि तयारी अवस्थामा रहन आग्रह गरिएको छ।
महत्त्वपूर्ण सूचना: त्रिशूली नदी आसपासका बासिन्दाले नदीको जलस्तर तथा बहावमा आएको परिवर्तनलाई ध्यान दिँदै प्रशासन र बाढी पूर्वानुमान महाशाखाले जारी गर्ने सूचनालाई निरन्तर पछ्याउन आवश्यक छ।
प्रतिक्रिया