कोलकाता । भारतको पश्चिम बङ्गालस्थित उत्तरी कोलकाताको चर्चित चोरबगान दुर्गा पूजा पण्डालमा शनिबार साँझ भएको भागदौडमा १९ जनाको मृत्यु भएको छ भने २५ जना घाइते भएका छन्। घाइतेमध्ये एक जनाको अवस्था गम्भीर रहेको मुख्यमन्त्री शुभेन्दु अधिकारीले जानकारी दिएका छन्।
मुख्यमन्त्रीका अनुसार घटनामा १७ जनाको घटनास्थलमै र अन्य दुई जनाको उपचारका क्रममा मृत्यु भएको थियो। मृतक तथा घाइतेहरूको पहिचान गर्ने काम भइरहेको प्रहरीले जनाएको छ। दुर्गा पूजामा सहभागी हुन कोलकाता बाहिरका विभिन्न जिल्लाबाट समेत ठूलो सङ्ख्यामा मानिसहरू त्यहाँ पुगेका थिए।
प्रत्यक्षदर्शीहरूका अनुसार साँझ करिब ७ः३० बजे ठूलो पानी पर्न थालेपछि पण्डालमा भीड बढेको थियो। साँघुरा गल्लीहरूबाट मानिसहरू पण्डालभित्र प्रवेश गर्न खोज्दा भित्र रहेका भक्तजन बाहिर निस्कन सकेनन्। बाहिर रहेका मानिसहरू पनि धकेलाधकेल गर्दै भित्र पस्न खोजेपछि अवस्था नियन्त्रणबाहिर पुगेको थियो।
पश्चिम बङ्गालका स्वास्थ्यमन्त्री शरद्वत मुखर्जीले पानी पर्न थालेपछि पण्डालमा ‘प्रेसर कुकर’ जस्तो अवस्था सिर्जना भएको बताएका छन्। उनका अनुसार भित्र रहेका मानिसहरू बाहिर निस्कन चाहन्थे भने बाहिर रहेका मानिसहरू भित्र प्रवेश गर्न खोजिरहेका थिए। यही दोहोरो चापले भागदौडको अवस्था सिर्जना गरेको प्रारम्भिक विवरणमा उल्लेख छ।
प्रत्यक्षदर्शीका अनुसार अस्थायी रूपमा बनाइएको भर्याङमा मानिसहरू एकअर्कामाथि खस्न थालेका थिए। पण्डालको संरचनाको कुनै भाग खसेको थियो कि थिएन भन्ने विषयमा पनि अनुसन्धान भइरहेको छ। घटनाको भयावह अवस्था पाँचदेखि सात मिनेटभित्रै सिर्जना भएको हुन सक्ने बताइएको छ।
एक प्रत्यक्षदर्शीले भीड नियन्त्रणका लागि पर्याप्त स्वयंसेवक परिचालन नगरिएको बताएका छन्। घटनाका एक पीडितले पण्डाल वरपरको बाटो साँघुरो रहेको, अँध्यारो भएको र पर्याप्त बत्तीसमेत नभएको बताएका छन्। प्रवेश र निकासको व्यवस्थापन कमजोर हुँदा मानिसहरू थप जोखिममा परेको हुन सक्ने आशङ्का गरिएको छ।
चोरबगान सार्वजनिक दुर्गा पूजा यस वर्ष ९१औँ वर्षमा प्रवेश गरेको थियो। पण्डालको उद्घाटन पाँच दिनअघि मुख्यमन्त्री अधिकारीले गरेका थिए। पण्डालमा प्रवेश गर्न साँघुरो गल्ली प्रयोग गर्नुपर्ने र बाहिर निस्कने बाटोमा समेत भीड लागेको प्रत्यक्षदर्शीहरूले बताएका छन्।
घटनापछि कोलकाताका अन्य तीन ठूला पूजा पण्डालमा भक्तजनको प्रवेश रोकिएको प्रहरी स्रोतले जनाएको छ। भीड बढिरहेका अन्य पूजा आयोजकहरूले पनि मानिसहरूलाई प्रवेश नदिने घोषणा गरेका छन्। समाचार एजेन्सी पीटीआईका अनुसार प्रहरीले चोरबगान दुर्गा पूजाका आयोजकसहित १२ जनालाई नियन्त्रणमा लिएको छ।
दुर्घटनाको कारण, भीड व्यवस्थापन र पण्डालको संरचनासम्बन्धी पक्षमा अनुसन्धान भइरहेको छ। मृतक तथा घाइतेको पहिचान र घटनाको विस्तृत विवरण आउन बाँकी छ।
प्रतिक्रिया