ऐश्वर्या रायसँग सम्बन्ध विच्छेद गर्ने भन्दै अभिषेकको डिपफेक भिडियो सार्वजनिक

काठमाडौं– डिप फेक भिडियोका कारण सेलेब्रेटीहरु पीडित बनिरहेको बेलामा बलिउड अभिनेता अभिषेक बच्चनको एउटा डिप फेक भिडियो सार्वजनिक भएको छ । भिडियोमा उनले आफ्नो पत्नी ऐश्वर्या रायसँग डिभोर्स लिन लागेको बताइरहेका छन् ।

पछिल्लो समयमा विश्व सुन्दरी ऐश्वर्या राय र अभिषेक बच्चनको बैबाहिक सम्बन्ध राम्रो नरहेको चर्चा चलिरहेको छ। उनीहरुले सम्बन्धविच्छेद गर्न लागेको समेत खबर पनि आइरहेका छन् । यसैबिच अभिषेकको उक्त भिडियो सामाजिक सञ्जालमा भाइरल भइरहेको छ । भिडियोमा उनले ऐश्वर्यासँग डिर्भोष लिन लागेको घोषणा गरिरहेका छन् । भिडियोमा भनिएको छ, ‘ऐश्वर्या र मैले डिभोर्स गर्ने निर्णय गरेका छौँ,’ भिडियोमा अभिनेता भन्छन्, ‘यस जुलाईमा ऐश्वर्या र मैले सम्बन्धविच्छेद गर्ने निर्णय गरेका छौँ। पछिल्ला केही वर्ष मेरी छोरी आराध्याका लागि राम्रो रहेनन् । तर, आज म यहाँ ऐश्वर्यासँग डिभोर्स लिनुको कारणबारे कुरा गर्न आएको छु ।’

तर यो भिडियो भने फेक रहेको छ । यसमा अभिषेकको आवाज र लिप सिङ्किङसँग पटक्कै मेल खाइरहेका छैन । आवाज पनि फरक सुनिएको छ । यो भाइरल भिडियो एआई प्रविधि वा कुनै अनलाइन उपकरण प्रयोग गरेर बनाइएको हो। यो भिडियो फेक भएको भन्दै सामाजिक सञ्जाल प्रयोग कर्ताहरुले भिडियोको निन्दा गरिरहेका छन् ।

हालै सम्पन्न भएको अनन्त अम्बानी र राधिका मर्चेन्टको विवाहमा अभिषेक र ऐश्वर्या छुट्टाछुट्टै सहभागी भएका थिए । सोपछि उनीहरु छुट्नि लागेको चर्चा चल्न थालेको थियो । यस पार्टीमा ऐश्वर्या छोरी आराध्यासँग पुगेकी थिइन् । पार्टीमा अभिषेकसहित बच्चन परिवारका बाँकी सदस्यहरू छुट्टै गएका थिए। यसबाहेक हालै अभिषेक बच्चनले सामाजिक सञ्जालमा उनीहरुको सम्बन्धविच्छेदसँग जोडिएको एक पोस्टलाई लाइक गरेपछि उनीहरु वास्तवमै छुट्टीन लागेको अड्कलबाजी बढेको थियो ।

रस्मिका मन्दना, आमिर खान, रणवीर सिंह, क्याट्रिन कैफ लगायतका बलिउड कलाकार यसअघि डिप फेकको सिकार भइसकेका छन् ।