भारतीय गुन्डा नाइकेको नाम दिएर धम्क्याउने फुँयालमाथी आपराधिक विश्वासघातको कसुरमा अनुसन्धान हुने

काठमाडौं– भारतीय गुन्डा नाइके लरेन्स विश्नोईको नाम लिएर नेपाली व्यवसायीलाई धम्क्याएको आरोपमा झापाबाट एकजना पक्राउ परेका छन् । प्रहरीको केन्द्रीय अनुसन्धान ब्यूरो (सीआईबी) को टोलीले झापाको मेचीनगर–१३ चारआलीबाट हरिचन्द्र फुँयाललाई पक्राउ गरेको हो ।

उनलाई सीआईबीको कार्यालय लाजिम्पाट ल्याएको छ । भारत र दुबईका नम्बरबाट फोन गर्दै विश्नोईको नाम लिएर धम्की दिएको भन्दै सीआईबीमा चार व्यवसायीहरूले उजुरी दिएका थिए ।

सोपछि सिआईबिले अनुसन्धान अघि बढाएको थियो । अनुसन्धानका क्रममा झापाका विवादास्पद मेडिकल व्यवसायी दुर्गा प्रसाईंको नाम लिएर पनि धम्की आएको खुलेको थियो ।

धम्की दिने व्यक्ति झापाबाटै पक्राउ परेकाले यस विषय गहन अनुसन्धान आवश्यक रहेको सीआईबीले जनाएको छ । फुँयालविरुद्ध आपराधिक विश्वासघातको कसुरमा अनुसन्धान हुने भएको छ । उनीविरुद्ध अब अदालतबाट पक्राउ पुर्जी जारी गराउने र म्याद थपको प्रक्रिया अघि बढाइने सीआईबीले जनाएको छ ।

धम्की दिन प्रयोग गरिएका नामका दुबै व्यक्ति हाल हिरासतमा छन् । प्रसाईंलाई साइबर अपराधको कसुरमा सीआईबीले नै ४ मंसिरमा भक्तपुरस्थित निवासबाट पक्राउ गरेको थियो ।

विश्नोई भने अहिले भारतको सबैभन्दा तिहाड जेलमा छन् । उनीमाथि फिरौती असुली र हत्याको आरोप छ । उनले पटक–पटक भारतीय अभिनेता सलमान खानलाई पनि ज्यान मार्ने धम्की दिने गरेका थिए ।