‘दुखी आत्मा’को गीतमा जुनार नै जुनार, आँचल र दयाको रोमान्स

फिल्म ‘दुखी आत्मा’को नयाँ गीतको छायांकन जुनार नै जुनार राखिएर गरिएको छ । फिल्ममा समावेश ‘जुनी जुनीलाई’ बोलको गीतको छायांकन भक्तपुर दरबार स्क्वायरको अगाडि गरिएको छ । रामजी लामिछानेले कोरियोग्राफी गरेको गीतको भिडियोमा आलोक शुक्लाको छायांकन, निमेष श्रेष्ठको सम्पादन छ ।

यो गीतको भिडियोमा नायक दयाहाङ राई र नायिका आँचल शर्मालाई फिचरिङ गरिएको छ । केही दिनमै गीतको भिडियो सार्वजनिक गर्ने तयारी निर्माणपक्षको छ ।

फागुनको २ गतेबाट रिलिजमा आउन लागेको यो फिल्मलाई दीपेन्द्र लामाले लेखन तथा निर्देशन गरेका हुन् । गीतमा केतन क्षेत्रीको संगीत, इश्वर कार्कीको शब्द तथा कम्पोज छ ।

फिल्मको टिजर सार्वजनिक भएसँगै ‘जुनार’ प्रयोग गरिएको संवाद निकै हिट छ । यसैले, यो गीतको भिडियोमा पनि सुन्तला र जुनारको प्रयोग भरपुर गरिएको देख्न सकिन्छ ।आलोक शुक्लाको छायांकन रहेको यो फिल्मलाई हिमाल कडरियाले निर्माण गरेका हुन् । सुदिप ढकाल कार्यकारी निर्माता रहेको फिल्ममा निमेष श्रेष्ठको सम्पादन छ ।

सामाजिक संजाल टिकटकमा यो फिल्मको ‘ब्रेकअप कविता’ भाइरल भइरहेको छ । फिल्ममा अनुप विक्रम शाही, वुद्दि तामाङ लगायतका कलाकारहरुको पनि अभिनय छ ।