काठमाडौँ रोल्पाको रुन्टिगढी गाउँपालिका–२ गोरिनेटामा अटो दुर्घटना हुँदा एक जनाको मृत्यु भएको छ भने दुई जना घाइते भएका छन्।
रा १ ह ५४९१ नम्बरको अटो सडकबाट करिब १०० मिटर तल खस्दा रुन्टिगढी गाउँपालिका–२ धारापानीका ६५ वर्षीय इन्द्र घर्तीको घटनास्थलमै मृत्यु भएको जिल्ला प्रहरी कार्यालय रोल्पाका इन्स्पेक्टर बिदुरचन्द्र अधिकारीले जानकारी दिएका छन्।
दुर्घटना मंगलबार दिउँसो करिब ३ बजे भएको हो। उक्त अटो रोल्पाको होलेरीबाट धारापानी जाँदै गर्दा दुर्घटनामा परेको प्रहरीले जनाएको छ। घटनामा घाइते हुनेहरूमा सुनिलस्मृति गाउँपालिका–२ का ६२ वर्षीय मान बहादुर परियार र रुन्टिगढी गाउँपालिका–१ का ३८ वर्षीय चालक मनराज नेपाली रहेका छन्। घाइतेहरूको स्थानीय स्वास्थ्य केन्द्रमा उपचार भइरहेको छ।
प्रहरीले दुर्घटनाको कारणबारे अनुसन्धान गरिरहेको जनाएको छ।
प्रतिक्रिया