काठमाडौँ- नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ ले ‘जनयुद्ध’ मेटाउने प्रयास गर्नेहरू आफैं खरानी हुने चेतावनी दिएका छन्।
बिहीबार पार्टीको केन्द्रीय कार्यालयमा आयोजित ३०औं ‘जनयुद्ध दिवस’ कार्यक्रममा सम्बोधन गर्दै उनले हजारौं शहीदहरूको बलिदान र बेपत्ताहरूको त्यागले सिँचिएको जनयुद्ध रहिरहने दाबी गरे।
कसैले मेटाएर यो मेटिने छैन। जसले मेटाउने दुस्साहस गर्छ, उही खरानी हुन्छ, प्रचण्डले चेतावनी दिए।
उनले ‘जनयुद्ध दिवस’ लाई सम्पूर्ण उत्पीडित समुदायका लागि राष्ट्रिय दिवसको रूपमा मान्यता दिनुपर्ने बताए। ‘जनयुद्ध’ शब्दलाई विकृत पार्ने प्रयास भइरहेको भन्दै उनले यसलाई नेपाली जनताको युगान्तकारी अभियानको रूपमा स्थापित गर्न निरन्तर प्रयास गर्नुपर्ने उल्लेख गरे।
प्रचण्डले गणतन्त्रलाई जनताको गणतन्त्र हुन नदिन विभिन्न प्रतिक्रियावादी शक्तिहरू सक्रिय रहेको आरोप पनि लगाए।
प्रतिक्रिया