काठमाडौँ । नेपालका लागि नवनियुक्त पाँच देशका आवासीय राजदूतले राष्ट्रपति रामचन्द्र पौडेलसमक्ष ओहोदाको प्रमाणपत्र प्रस्तुत गरेका छन्।
राष्ट्रपति कार्यालयमा बुधबार आयोजित छुट्टाछुट्टै विशेष समारोहमा थाइल्याण्ड, ब्राजिल, पाकिस्तान, फ्रान्स र गणतन्त्र कोरियाका नवनियुक्त राजदूतहरूले आ–आफ्नो ओहोदाको प्रमाणपत्र बुझाएका हुन्।
राष्ट्रपति कार्यालयका अनुसार थाइल्याण्डका राजदूत डोनाविट पूल्सावत, संघीय गणतन्त्र ब्राजिलका राजदूत क्लाउडियो राजा गाबाग्लिया लिन्स, इस्लामिक गणतन्त्र पाकिस्तानका राजदूत मोहम्मद आमिर खान, फ्रान्सका राजदूत फ्रान्स्वाज पुइग–इन्जा र गणतन्त्र कोरियाका राजदूत पार्क जे–क्युङले राष्ट्रपति पौडेलसमक्ष प्रमाणपत्र प्रस्तुत गरेका हुन्।
समारोहमा नेपाल सरकारका उच्च पदस्थ अधिकारीहरूको समेत उपस्थिति रहेको राष्ट्रपति कार्यालयका प्रवक्ता कृष्णबहादुर शाहीद्वारा जारी विज्ञप्तिमा उल्लेख छ।
नवनियुक्त राजदूतहरूलाई लाजिम्पाटस्थित निवासबाट राष्ट्रपति कार्यालयसम्म विशेष समारोहका साथ रिसल्लासहितको बग्गीमा सवारी गराइएको थियो।
ओहोदाको प्रमाणपत्र प्रस्तुत गरेसँगै पाँचै देशका राजदूतले नेपालमा आफ्नो औपचारिक कूटनीतिक जिम्मेवारी सम्हालेका छन्।
प्रतिक्रिया