काठमाडौँ । राष्ट्रिय स्वतन्त्र पार्टी (रास्वपा)का सांसद गणेश कार्कीले संसद् अधिवेशन अन्त्य भएपछि सरकारले अध्यादेशमार्फत आवश्यक काम अघि बढाउनुपर्ने बताएका छन्।
प्रतिनिधिसभाको बैठकमा बोल्दै सांसद कार्कीले संसदीय प्रक्रियामा सुधार आवश्यक रहेको बताए। उनले आफ्नो निर्वाचन क्षेत्र मोरङ–३ का जनताले समाधानको अपेक्षा गरेका स्थानीय समस्या रहेको उल्लेख गर्दै ती समस्या छिटो सम्बोधन हुने गरी संसदीय प्रक्रिया निर्माण हुनुपर्ने धारणा राखे।
उनले संसद्को नियमित प्रक्रियाबाट स्थानीय तहमा लामो समयदेखि समाधान पर्खिरहेका कतिपय समस्या तत्काल सम्बोधन गर्न कठिन हुने बताए। विशेषगरी आफ्नो निर्वाचन क्षेत्रसँग सम्बन्धित भूमिको समस्या समाधानका लागि विद्यमान संसदीय प्रक्रियाले पर्याप्त गति दिन नसकेको उनको भनाइ थियो।
‘समाधान पर्खिएका हाम्रा स्थानीय समस्याहरू छन्। हाम्रो संसदीय प्रक्रियाको सुधार अत्यावश्यक छ,’ सांसद कार्कीले भने, ‘संसद्को नियमित प्रक्रिया मेरो क्षेत्रको भूमिको समस्यालाई छिटो समाधान दिन सक्ने गरी निर्माण भएको छैन।’
उनले विद्यमान संसदीय व्यवस्थाले यस्ता विषयलाई तत्काल अघि बढाउन अध्यादेशबाहेक अर्को प्रभावकारी बाटो नदिएको दाबी गरे। स्थानीय समस्या समाधानका लागि आवश्यक कानुनी व्यवस्था गर्न सरकारले अब अध्यादेशको माध्यमबाट काम अघि बढाउनुपर्नेमा उनले सरकारको ध्यानाकर्षण गराए।
सांसद कार्कीले संसद् अधिवेशन अन्त्य भए पनि जनताका समस्या समाधान गर्ने काम रोकिन नहुने बताए। तत्काल सम्बोधन गर्नुपर्ने विषयमा सरकारले आवश्यक कानुनी तथा प्रशासनिक प्रक्रिया अघि बढाउनुपर्ने उनको भनाइ थियो।
प्रतिक्रिया