काठमाडौं । नेपाल प्रिमियर लिग (एनपीएल) अन्तर्गत मंगलबार दुई खेल हुँदैछन् । प्रतियोगिताको पहिलो दिन सोमबार एक खेल मात्रै भएकोमा दोस्रो दिन चार टोली मैदानमा उत्रिँदै छन् । बिहान चितवन राइनोज र विराटनगर किङ्ग्सबीच प्रतिस्पर्धा हुनेछ भने साँझ जनकपुर बोल्ट्स र कर्णाली याक्स आमनेसामने हुनेछन् ।
सोमबार भएको उद्घाटन खेलमा लुम्बिनी लायन्सले सुदूरपश्चिम रोयल्सलाई सात विकेटले पराजित गर्दै प्रतियोगितामा विजयी सुरुआत गरेको थियो । मंगलबार हुने दुवै खेलमा टोलीहरू जित निकाल्दै प्रतियोगितामा आफ्नो स्थिति बलियो बनाउने लक्ष्यसहित मैदानमा उत्रिनेछन् ।
पहिलो खेलमा चितवन र विराटनगरको भिडन्त
मंगलबार बिहान हुने पहिलो खेलमा सन्दीप लामिछानेको कप्तानीमा रहेको विराटनगर किङ्ग्सले कुशल मल्लको नेतृत्वमा रहेको चितवन राइनोजको सामना गर्नेछ ।
विराटनगरको टोलीमा लोकेश बम, बसिर अहमद, प्रतिश जीसी, सुवास भण्डारी, नारायण जोशी, रुपेश सिंह, नरेन साउद र सुजन थपलियालगायत नेपाली खेलाडी छन् । त्यस्तै, इमरान शेख, प्रतिक श्रेष्ठ, आन्द्रे रसेल, एन्जेलो म्याथ्युज, शुभम रन्जाने र चरिथ असलंकाजस्ता विदेशी खेलाडी पनि टोलीमा समावेश छन् ।
उता, चितवनको टोलीमा देव खनाल, अर्जुन साउद, रिजन ढकाल, कमल सिंह ऐरी, दीपक बोहरा, विवेक यादव, मौसम ढकाल र विपिन रावललगायत खेलाडी छन् । विदेशी खेलाडीका रूपमा रवि बोपारा, सिकन्दर राजा, कलिम साना, हसन अली र उसामा मीरलगायत रहेका छन् ।
दुवै टोलीमा अनुभवी विदेशी खेलाडी र प्रतिभाशाली नेपाली खेलाडी रहेकाले पहिलो खेल प्रतिस्पर्धात्मक हुने अपेक्षा गरिएको छ ।
साँझ जनकपुर र कर्णाली भिड्ने
मंगलबार साँझ हुने दोस्रो खेलमा जनकपुर बोल्ट्स र कर्णाली याक्सबीच प्रतिस्पर्धा हुनेछ । जनकपुरको कप्तानी हर्मित सिंहले गर्नेछन् भने कर्णालीको नेतृत्व सोमपाल कामीले सम्हाल्नेछन् ।
जनकपुरको टोलीमा कुशल परेरा, ललित राजवंशी, मयन यादव, अनिल साह, विकास आग्री, आदित्य मेहता र तृतराज दासलगायत खेलाडी छन् । त्यस्तै, अभिषेक तिवारी, विशाल पटेल, रित गौतम, सन्तोष कार्की, जिमी निशम, मोइन अली र इफ्तिकार अहमद पनि टोलीमा समावेश छन् ।
कर्णाली याक्समा सोमपाल कामी, डेभिड मिलर, नन्दन यादव, युवराज खत्री, पवन सर्राफ, विपिनप्रसाद शर्मा, दीपक डुम्रे, युनिश सिंह ठकुरी, शुभ कंसाकार, दीपेन्द्र रावत, सूर्य तामाङ, सचिन शर्मा र दिवान पुनलगायत खेलाडी छन् ।
जनकपुर र कर्णाली दुवै टोलीका लागि दोस्रो खेलमा जित निकाल्नु महत्वपूर्ण हुनेछ । त्यसैले साँझको प्रतिस्पर्धामा पनि दर्शकले रोमाञ्चक क्रिकेट हेर्न पाउने अपेक्षा गरिएको छ ।
कात्तिक २९ सम्म समूह चरणका खेल
सोमबारदेखि सुरु भएको एनपीएलको समूह चरणका खेल कात्तिक २९ गतेसम्म सञ्चालन हुनेछन् । त्यसपछि प्रतियोगिता प्लेअफ चरणमा प्रवेश गर्नेछ ।
निर्धारित तालिकाअनुसार मङ्सिर १ गते पहिलो र दोस्रो स्थानमा रहने टोलीबीच पहिलो क्वालिफायर हुनेछ । मङ्सिर २ गते तेस्रो र चौथो स्थानमा रहने टोलीबीच इलिमिनेटर खेलाइनेछ ।
मङ्सिर ३ गते पहिलो क्वालिफायरमा पराजित टोली र इलिमिनेटरमा विजयी टोलीबीच दोस्रो क्वालिफायर हुनेछ । प्रतियोगिताको फाइनल मङ्सिर ५ गते आयोजना हुने तालिका छ ।
समूह चरणका खेलसँगै टोलीहरू प्लेअफमा स्थान सुरक्षित गर्ने लक्ष्यमा रहनेछन् । मंगलबारका दुई खेलले प्रतियोगिताको प्रारम्भिक समीकरणमा प्रभाव पार्ने भएकाले क्रिकेटप्रेमीको ध्यान चितवन–विराटनगर र जनकपुर–कर्णालीको प्रतिस्पर्धातर्फ केन्द्रित हुनेछ ।
प्रतिक्रिया