किसानले दिए प्रहरीलाई खीर खान एक सय ६० लिटर दूध

दाङका किसानले प्रहरीलाई खीर खान भन्दै दूध दिएका छन्।राष्ट्रिय पशुपालक दूग्ध उत्पादन समाज नेपाल तुलसीपुर नगर समिति दाङले प्रहरीलाई एक सय ६० लिटर दूध दिएका हुन्।इलाका प्रहरी कार्यालय तुलसीपुरमा पुगेर किसानले एक सय १० लिटर र सशस्त्र प्रहरी वेश क्याम्प दोघरेमा पुगेर ५० लिटर दूध शनिबार दिएको नगरसमिति अध्यक्ष लोकराज डाँगीले बताए।

शनिवार किसानले खीर खान दिएको दूधको बजार मूल्य ११ हजार दुई सय बराबर हो।‘लकडाउनमा प्रहरीहरू दिनरात खटिरहेका छन्। सुरक्षाकर्मीको मनोवल बढोस् भनेर हामीले दूध दिएका हौं,’ उनले भने। दूध विक्री गर्न लकडाउनका बेला पनि प्रहरीले रोकेको छैन।