कृषि विकास बहुउद्देश्यीय सहकारी संस्थाबाट ९४ करोडभन्दा बढी ठगी,ठगी गरेको आरोपमा चार जना पक्राउ

काठमाडौं – कृषि विकास बहुउद्देश्यीय सहकारी संस्थाको झण्डै ९४ करोड २३ लाख रुपैयाँ रुकम ठगी गरेको आरोपमा प्रहरीले चार जनालाई पक्राउ गरी सार्वजनिक गरेका छन् । काठमाडौं उपत्यका अपराध अनुसन्धान कार्यालयको टोलीले आज पत्रकार सम्मेलन गरी संस्थाका अध्यक्ष, व्यवस्थापक र सदस्यहरुलाई सार्वजनिक गरेको छ ।

पक्राउ पर्नेहरुमा तनहुँको ब्यास नगरपालिका वडा नम्बर ११ घर भई हाल काठमाडौंको गोकर्ण बस्ने कृषि विकास बहुउद्देश्यीय सहकारी संस्थाका अध्यक्ष तेजविक्रम थापा, उनकी श्रीमती सजना राजकर्णिकार तथा सहकारी संस्थाका सदस्यद्वय ५३ वर्षीय भिमसेन महर्जन र ४७ वर्षीय सञ्जय सापकोटा रहेका छन् । तेजविक्रम र सजना श्रीमान–श्रीमती हुन् । तेजविक्रम अध्यक्ष र सजना व्यवस्थापकको जिम्मेवारीमा रहेका थिए । ललितपुरको कुमारीपाटीस्थित सो सहकारी संस्थाले बचतकर्ताको ९४ करोड २३ लाख ४२ हजार रुपैयाँ ठगी गरेको पाइएको प्रहरीले बताएको छ । सो संस्थाबाट २ हजार ५३१ जना बचतकर्ता पीडित भएको र ५६६ जनाले प्रहरीमा जाहेरी दिएको प्रहरीको भनाइ रहेको छ ।