पोखरामा राजेश हमालको दौडधुपः कोटीहोम पुगे, दर्शकसँग नाँचे

नायक राजेश हमालले फिल्म ‘नरसिंहाः अवतार’को प्रचारका लागि अझै पनि दौडधुप गरिरहेका छन् । नायक हमालको यो दौडधुपलाई धेरैले विशेष रुपमा समेत हेरेका छन् । आफ्ना कारणले फिल्मलाई फाइदा हुन्छ भने किन मिहिनेत नगर्ने भन्ने सोच हमालमा देखिन्छ ।

उनै, हमाल मंगलबार पोखरा पुगे । फिल्मको सिंगो टिमसहित पोखरा पुगेका हमाल दिनभर व्यस्त रहे ।

पोखरामा जारी कोटी होममा नायक हमालले १ घन्टा समय बिताए । कोटीहोममा पुगेर उनले जीवन र दर्शनको कुरा गरे । धर्म र मनोरञ्जनको कुरा गरे । हमालको कुराले पोखरेलीवासीहरु प्रभावित बनेका थिए ।

कोटी होममा १ घन्टा जस्तो समय बिताएका राजेश हमाल पोखराका मिडटाउन र क्यूएफएक्स हलमा दर्शकसँग साक्षात्कार गर्न पुगेका थिए ।

हलमा पुगेका हमालले दर्शकसँग तस्वीर खिचाए, नृत्य गरे र खुशी साटे ।

पोखरामा हमालको क्रेज गज्जब देखियो । हमाललाई फिल्मको टिमले बाजागाजा बजाएरै स्वागत गरेको थियो । हल–हलमा बाजा बजाउँदै हमाललाई प्रवेश गराइएको थियो ।

पोखरेली दर्शकहरु राजेश हमालको उपस्थितीले दंग देखिए । हमालको साथमा फिल्मका मुख्य नायक राज कटुवाल, नायिका सनिषा भट्टराई, निर्माता ध्रुव न्यौपाने, बाल कलाकार एभिलिना खड्का, कलाकार रमेश चन्द सोडारी, वितरक छविराज ओझा लगायत पोखरा पुगेका थिए ।

दिवाकर भट्टराइको लेखन तथा निर्देशनमा तयार भएको यो फिल्म जेठको ९ गतेबाट रिलिजमा आएको हो । फिल्ममा ध्रुव न्यौपाने, नेम महर्जन, नरेन्द्र महर्जन, दीपक प्रसाद ढकालको लगानी छ ।

नायक राजेश हमालको साथमा अर्का नायक राज कटुवाल र नायिका सनिषा भट्टराइको दौडधुप पनि गज्जब देखियो । सनिषाको गृह जिल्ला भएका कारण पनि नायिका व्यस्त देखिइन् । उनले, आफ्नो गृहजिल्लाबाट आफूलाई विशेष साथ मिलेको बताइन् ।