राजिनामाको चर्को दवाव पछि गृहमन्त्री सुधन गुरुङको यस्तो स्पष्टिकरण

पछिल्ला दिनहरूमा आफ्नो नाम जोडेर फैलाइएका विभिन्न चर्चाप्रति सम्बन्धित व्यक्तिले औपचारिक रूपमा स्पष्टिकरण दिएका छन्। विषयलाई अनावश्यक रूपमा जटिल बनाइएको भन्दै उनले वास्तविकता सरल भाषामा बुझ्न आग्रह गरेका छन्।

उनका अनुसार “२५ लाखको सेयर लुकाइएको” भन्ने आरोप तथ्यमा आधारित नभई गलत व्याख्या हो। उनले धितोपत्र बजारमा कारोबार हुने सेयरहरूमा २ करोडभन्दा बढी लगानी सम्पत्ति विवरणमै खुला रूपमा उल्लेख गरिसकेको जनाएका छन्। स्टार माइक्रो इन्स्योरेन्स र लिबर्टी माइक्रोमा गरिएको लगानी पनि यही समूहभित्र समावेश गरिएको स्पष्ट पारेका छन्।

“लुकाउने उद्देश्य भएको व्यक्तिले खुला रूपमा करोडौँको सम्पत्ति देखाउँदैन,” उनले भने।

त्यस्तै, “मन्त्री हुनुअघि सेयर किनिएको” विषयमा उठेका प्रश्नप्रति प्रतिक्रिया दिँदै उनले सेयरमा लगानी गर्नु कानुनी रूपमा अपराध नभएको उल्लेख गरेका छन्। सम्पूर्ण कारोबार बैंकिङ च्यानलमार्फत पारदर्शी रूपमा गरिएको र त्यसको पूर्ण रेकर्ड उपलब्ध रहेको उनको भनाइ छ।

लगानीको स्रोतबारे स्पष्ट पार्दै उनले २०८०/०५/२९ मा लिएको कर्जामार्फत रकम जुटाइएको र सोही रकम बैंकिङ प्रणालीबाट लगानी गरिएको जानकारी दिएका छन्। “पैसा कहाँबाट आयो भन्ने कुरा अनुमानको होइन, कागज र बैंक रेकर्डले प्रमाणित गर्ने विषय हो,” उनले स्पष्ट पारे।

“विवादित व्यक्तिसँग साझेदारी” भन्ने आरोपलाई पनि उनले अस्वीकार गरेका छन्। एउटै कम्पनीमा सयौँ–हजारौँ सेयरधनी हुने भएकाले सेयर किन्नु सबैसँग साझेदारी गर्नु नभएको उनको तर्क छ।

यस्तै, “Conflict of interest” सम्बन्धी आरोपमा छानबिन प्रक्रिया सम्बन्धित निकायबाट नै अगाडि बढिरहेको उनले जानकारी दिएका छन्। उनले गृह मन्त्रालय नभई अर्थ मन्त्रालय अन्तर्गतको सम्पत्ति शुद्धिकरण विभागले यस विषयमा प्रक्रिया अनुसार काम गरिरहेको बताएका छन्।

“पृष्ठभूमि नजाँची लगानी गरिएको” भन्ने आरोपप्रति उनले व्यापारिक लगानीमा जोखिम रहने र भविष्यका सबै अवस्था पहिल्यै थाहा नहुने उल्लेख गरेका छन्।

कानुनी रूपमा संवेदनशील विषय भएकाले तत्काल प्रतिक्रिया नदिएको स्पष्ट पार्दै उनले हल्लाभन्दा प्रमाणमा आधारित निष्कर्षमा पुग्नुपर्नेमा जोड दिएका छन्।

अन्त्यमा, उनले पार्टीले गर्ने हरेक निर्णयलाई स्वीकार गर्ने र अनुसन्धानमा पूर्ण सहयोग गर्ने प्रतिबद्धता व्यक्त गरेका छन्।