काठमाडौं । फिफा विश्वकप २०२६ अब अन्तिम चरणमा पुगेको छ। सेमिफाइनलका रोमाञ्चक प्रतिस्पर्धा सकिएसँगै उपाधिका लागि अर्जेन्टिना र स्पेन आमनेसामने हुने भएका छन्। विश्व फुटबलको सम्पूर्ण ध्यान अब सोमबार न्युयोर्क–न्युजर्सी स्टेडियममा हुने बहुप्रतीक्षित फाइनलमा केन्द्रित भएको छ।
अर्जेन्टिनाले सेमिफाइनलमा इंग्ल्यान्डलाई २–१ ले पराजित गर्दै फाइनल यात्रा तय गर्यो भने स्पेनले फ्रान्समाथि २–० को प्रभावशाली जित निकाल्दै उपाधि भिडन्तमा स्थान सुरक्षित गर्यो।
साविक विश्वविजेता अर्जेन्टिना लगातार दोस्रो पटक विश्वकप जित्दै आफ्नो वर्चस्व कायम राख्ने लक्ष्यमा हुनेछ। यता, सन् २०१० पछि पहिलो पटक विश्व च्याम्पियन बन्ने लक्ष्यसहित स्पेन १६ वर्षको प्रतीक्षा अन्त्य गर्ने अभियानमा मैदान उत्रिनेछ।
फाइनललाई अझ विशेष बनाउने अर्को आकर्षण भनेको दुई पुस्ताका स्टार खेलाडीबीचको प्रतिस्पर्धा हो। एकातिर आफ्नो करियरको अन्तिम विश्वकप यात्रामा रहेका लियोनेल मेस्सी छन् भने अर्कोतर्फ स्पेनका युवा सनसनी लामिन यामाल भविष्यको नयाँ सुपरस्टारका रूपमा चम्किरहेका छन्।
अब फुटबलप्रेमीहरूको नजर न्युयोर्क–न्युजर्सी स्टेडियममा हुनेछ, जहाँ ९० मिनेट (वा आवश्यक परे अतिरिक्त समय र पेनाल्टी सुटआउट) ले विश्व फुटबलको नयाँ सम्राट को बन्ने भन्ने निर्णय गर्नेछ।
प्रतिक्रिया