काठमाडौँ। बागमती प्रदेशका मुख्यमन्त्री किरण थापा मगरले विश्वासको मत लिने प्रक्रिया पेचिलो बन्दै जाँदा प्रदेशसभाकी उपसभामुख अप्सरा चापागाईंको भूमिकामाथि विपक्षी दलहरूले प्रश्न उठाएका छन् ।
सभामुख पद रिक्त रहेको अवस्थामा प्रदेशसभा सञ्चालनको जिम्मेवारी सम्हालेकी चापागाईंले निष्पक्ष भूमिका निर्वाह गर्न नसकेको विपक्षी दलहरूको आरोप छ । बैठक पटक–पटक सारिएको र सरकारको अनुकूलतामा समय निर्धारण गरिएको भन्दै उनीहरूले उपसभामुखको तटस्थतामाथि शंका गरेका हुन् ।
नेपाली कांग्रेसका मुख्य सचेतक पुकार महर्जनले उपसभामुखले स्वतन्त्र हैसियत गुमाउँदै सरकारको ‘रबर स्ट्याम्प’ बन्न खोजेको आरोप लगाए । राप्रपाकी प्रमुख सचेतक कुमारी तामाङले पनि कारबाहीमा परेका सांसदको पदमुक्ति प्रक्रिया अघि नबढाएर सत्ता गठबन्धन जोगाउन खोजेको आरोप लगाइन् ।
नेपाल मजदुर किसान पार्टीका संसदीय दलका नेता सुरेन्द्रराज गोसाईंले उपसभामुखलाई ‘एमालेको प्रवक्ता बन्ने भए राजीनामा दिएर प्रवक्ता बन्न’ चुनौती दिए ।
तर उपसभामुख चापागाईंले आफूले प्रदेशसभा नियमावलीअनुसार नै काम गरिरहेको र आफ्नो भूमिकामाथि शंका गर्नुपर्ने कुनै कारण नरहेको बताएकी छन् । उनले सबै दलसँग छलफल गरेर सहमतिमै संसद्को प्रक्रिया अघि बढाइएको दाबी गरिन् ।
प्रदेशसभा सचिवालयले पनि बैठकको मिति र समय परिवर्तन गर्ने अधिकार नेतृत्वसँग रहेको भन्दै विश्वासको मतसम्बन्धी प्रक्रिया संविधान र नियमावलीअनुसार नै भइरहेको स्पष्ट पारेको छ ।
प्रतिक्रिया