काठमाडौं – रसुवा जिल्लामा बुधवार बिहान अचानक आएको भीषण बाढीबाट प्रभावित क्षेत्रका बासिन्दालाई एनसेलले राहतस्वरूप तीन दिनका लागि निःशुल्क सञ्चार सेवा उपलब्ध गराउने भएको छ ।
एनसेलका अनुसार बाढी प्रभावित क्षेत्रहरूमा तीन दिनसम्म भ्वाइस र डेटा सेवा निःशुल्क उपलब्ध हुनेछ । त्यसैगरी, प्रभावित क्षेत्रका सर्वसाधारणलाई तीन दिन समयावधि रहेको १०० वटा एसएमएस पनि निःशुल्क प्रदान गरिनेछ ।
बाढीका कारण प्रभावित क्षेत्रमा सञ्चार सम्पर्क सहज बनाउनुपर्ने आवश्यकता देखिएपछि एनसेलले यस्तो निर्णय गरेको जनाएको छ । प्राकृतिक विपद्का बेला परिवार, आफन्त, स्थानीय प्रशासन तथा उद्धारमा खटिएका टोलीसँग निरन्तर सम्पर्कमा रहन सञ्चार सेवा महत्वपूर्ण हुने भएकाले निःशुल्क सेवा उपलब्ध गराइएको कम्पनीको भनाइ छ ।
यस पहलबाट बाढी प्रभावित क्षेत्रका नागरिकले आवश्यक सूचना आदानप्रदान गर्न, आफ्ना परिवार तथा आफन्तको अवस्थाबारे जानकारी लिन र उद्धार तथा राहतमा खटिएका निकायसँग सहज रूपमा सम्पर्क गर्न सक्ने अपेक्षा गरिएको छ ।
विशेषगरी विपद्का बेला मोबाइल सञ्चार सेवा अवरुद्ध वा सीमित हुँदा प्रभावित नागरिकलाई थप समस्या पर्न सक्ने भएकाले सञ्चार सेवा निरन्तर राख्नु महत्वपूर्ण मानिन्छ । एनसेलको यो पहलले प्रभावित क्षेत्रका सर्वसाधारणलाई आपतकालीन अवस्थामा सम्पर्कमा रहन थप सहज हुने अपेक्षा गरिएको छ ।
एनसेलले विगतदेखि नै प्राकृतिक विपद् तथा आपतकालीन अवस्थामा सक्रिय भूमिका निर्वाह गर्दै आएको जनाएको छ । कम्पनीले विपद्का समयमा आपतकालीन खोज तथा उद्धार, राहत वितरणलगायतका कार्यमा समेत विभिन्न माध्यमबाट सहयोग पुर्याउँदै आएको उल्लेख गरेको छ ।
कम्पनीका अनुसार हालको निर्णय पनि बाढी प्रभावित नागरिकलाई आपतकालीन अवस्थामा सञ्चार सम्पर्कबाट टाढा हुन नदिन तथा आवश्यक सूचना आदानप्रदान सहज बनाउन गरिएको हो ।
रसुवामा आएको भीषण बाढीका कारण विभिन्न क्षेत्रमा जनजीवन प्रभावित भएको छ । बाढी प्रभावितको उद्धार तथा राहतका लागि नेपाली सेना, नेपाल प्रहरी, सशस्त्र प्रहरीलगायतका सुरक्षा निकाय तथा स्थानीय तह सक्रिय छन् । यस्तो अवस्थामा सञ्चार सम्पर्कलाई प्रभावकारी बनाउन एनसेलले उपलब्ध गराएको निःशुल्क डेटा, भ्वाइस र एसएमएस सेवाले प्रभावित नागरिकलाई प्रत्यक्ष सहयोग पुग्ने अपेक्षा गरिएको छ ।
प्रतिक्रिया