काठमाडौं । अब अन्य जिल्लाबाट नेपाली नागरिकताको प्रमाणपत्र लिएका नागरिकले प्रतिलिपि लिनकै लागि सम्बन्धित जिल्ला धाउनुपर्ने बाध्यता हटेको छ। निश्चित सर्त पूरा गरेका नागरिकले काठमाडौं उपत्यकाका जिल्ला प्रशासन कार्यालयबाटै नागरिकताको प्रतिलिपि लिन सक्ने भएका छन्।
जिल्ला प्रशासन कार्यालय काठमाडौंले सूचना जारी गर्दै नयाँ व्यवस्थाअनुसार नागरिकताको प्रतिलिपि वितरण गरिने जनाएको हो। नेपाल सरकारको १०० बुँदे शासकीय सुधार कार्यसूचीको बुँदा नम्बर २१ तथा नेपाल नागरिकता (पाँचौँ संशोधन) नियमावली, २०८३ बमोजिम यस्तो व्यवस्था गरिएको कार्यालयले जनाएको छ।
नयाँ व्यवस्थाअनुसार नागरिकताको प्रमाणपत्र आगलागी, बाढी वा पानीले भिजेर नष्ट भएको, च्यातिएर प्रयोग गर्न नसकिने भएको, हराएको, नयाँ ढाँचामा आवश्यक परेको वा अन्य कारणले प्रतिलिपि लिनुपर्ने नागरिकले उपत्यकाबाटै सेवा लिन सक्नेछन्।
कुन प्रदेशका नागरिकले कहाँबाट सेवा लिने?
व्यवस्थाअनुसार विभिन्न प्रदेशबाट नागरिकता लिएका नागरिकले उपत्यकाका तीन जिल्ला प्रशासन कार्यालयमध्ये तोकिएको कार्यालयबाट प्रतिलिपि लिन सक्नेछन्।
- काठमाडौं जिल्ला प्रशासन कार्यालय: बागमती, गण्डकी र लुम्बिनी प्रदेशका जिल्लाबाट नागरिकता लिएका नागरिकले काठमाडौं जिल्ला प्रशासन कार्यालय तथा यसअन्तर्गतका कार्यालयबाट सेवा लिन सक्नेछन्।
- ललितपुर जिल्ला प्रशासन कार्यालय: कर्णाली र सुदूरपश्चिम प्रदेशका जिल्लाबाट नागरिकता लिएका नागरिकले ललितपुरबाट सेवा लिन सक्नेछन्।
- भक्तपुर जिल्ला प्रशासन कार्यालय: कोशी र मधेस प्रदेशका जिल्लाबाट नागरिकता लिएका नागरिकले भक्तपुरबाट सेवा लिन सक्नेछन्।
नागरिकताको प्रतिलिपि लिन सम्बन्धित कार्यालयमा निवेदन पेस गर्नुपर्नेछ। बागमती, गण्डकी र लुम्बिनी प्रदेशका जिल्लाबाट नागरिकता लिएका व्यक्तिको हकमा निवेदकको जैविक विवरण राष्ट्रिय परिचय व्यवस्थापन सूचना प्रणाली र केन्द्रीकृत नागरिकता सूचना व्यवस्थापन प्रणालीमा रहेको विवरणसँग मेल खानुपर्नेछ।
कस्ता अवस्थामा आफ्नै जिल्ला जानुपर्छ?
नयाँ व्यवस्थाले सबै प्रकारका नागरिकता सम्बन्धी समस्या उपत्यकाबाटै समाधान हुने भने होइन। नागरिकताको अभिलेख नभेटिएको वा अभिलेखमा उल्लेख भएभन्दा फरक नाम, थर, जन्ममिति वा अन्य विवरण सच्याएर प्रतिलिपि लिन चाहने व्यक्तिले नागरिकता सुरुमा जारी भएको जिल्लामै सम्पर्क गर्नुपर्नेछ।
त्यस्तै, पहिलो दृष्टिमै नागरिकताको विवरण शंकास्पद देखिएका निवेदकले पनि नागरिकता जारी भएको सम्बन्धित जिल्लामै जानुपर्ने जिल्ला प्रशासन कार्यालय काठमाडौंले जनाएको छ।
यस व्यवस्थाले नागरिकताको प्रतिलिपि लिनकै लागि टाढाका जिल्ला पुग्नुपर्ने बाध्यता कम गर्ने र सेवाग्राहीलाई सहज रूपमा सेवा उपलब्ध गराउने अपेक्षा गरिएको छ। तर, सेवा लिनुअघि आफ्नो नागरिकताको अभिलेख र विवरण तोकिएका सर्तअनुसार मिलेको छ वा छैन भन्ने यकिन गर्नु आवश्यक हुनेछ।
प्रतिक्रिया