कावासोतीमा काठमाडौं आउँदै गरेको यात्रुवाहक बस दुर्घटना


नवलपुर । नवलपुरको कावासोतीमा यात्रुवाहक बस दुर्घटना हुँदा २५ जना घाइते भएका छन् । धनगढीबाट काठमाडौं आउँदै गरेको बस सोमबार बिहान पूर्व–पश्चिम राजमार्गअन्तर्गत कावासोती नगरपालिका–११ लोकाहामा दुर्घटनामा परेको हो ।

प्रहरीका अनुसार सोमबार बिहान करिब ६ः४० बजे सुदूरपश्चिम प्रदेश ०१–००१ ख ३४७५ नम्बरको बस चालकले नियन्त्रण गुमाउँदा सडकमा पल्टिएको थियो ।

दुर्घटनामा बसमा सवार २५ जना यात्रु घाइते भएका छन् । घाइतेमध्ये केहीको अवस्था सामान्य र केहीको मध्यम रहेको प्रहरीले जनाएको छ ।

दुर्घटनालगत्तै घाइतेहरूको उद्धार गरी उपचारका लागि डण्डास्थित मध्यविन्दु प्रादेशिक अस्पताल पठाइएको छ । अस्पतालमा उनीहरूको उपचार भइरहेको छ ।

बस दुर्घटनाको कारणबारे प्रहरीले थप अनुसन्धान गरिरहेको जनाएको छ । दुर्घटनामा घाइते भएका यात्रुहरूको विस्तृत परिचय तथा अवस्थाबारे थप विवरण आउन बाँकी रहेको छ ।

धनगढीबाट काठमाडौंका लागि छुटेको यात्रुवाहक बस बिहानै दुर्घटनामा परेपछि पूर्व–पश्चिम राजमार्गको लोकाहा क्षेत्रमा केही समय चहलपहलसमेत प्रभावित भएको थियो ।