खैरो हेरोइनसहित भारतीय नागरिक पक्राउ

सङ्खुवासभाको खाँदबारी नगरपालिका–१ बाट एक जना भारतीय नागरिक अवैध लागु औषध खैरो हेरोइनसहित बुधबार पक्राउ परेका छन् । पक्राउ पर्नेमा बिहार घर भएका ३० वर्षीय एमडी साहेवजान रहेका छन् ।

जिल्ला प्रहरी कार्यालय सङ्खुवासभाका प्रहरी निरीक्षक रामकुमार लामिछानेका अनुसार प्रहरीले विशेष सूचनाका आधारमा साहेवजानलाई टुँडिखेल बसपार्क क्षेत्रबाट पक्राउ गर्न सफल भएको छ । केही समयदेखि उनले लागु औषधको कारोबार गरिरहेको गोप्य सूचना आएको हो । त्यसैको आधारमा हामीले निरन्तर निगरानीपछि उनलाई पक्राउ गर्न सफल भयौँ,’ लामिछानेले भनेका छन् । उनको साथबाट २.८ ग्राम खैरो हेरोइन र नगद २० हजार रुपैयाँ बरामद गरिएको प्रहरीको भनाई रहेको छ । उनीमाथि लागु औषध (नियन्त्रण) ऐन, २०३३ बमोजिम थप अनुसन्धान भइरहेको छ ।