पहिरोले गोठ पुरिँदा एक जनाको मृत्यु

बुटवल– पहिरोले गोठ पुरिंदा अर्घाखाँचीमा एक जनाको मृत्यु भएको छ ।

मंगलबार बिहान परेको वर्षाका कारण शितगंगा नगरपालिका–१३, सिमलपानीमा २ तले गोठ माथिबाट पहिरो खसेको थियो । पहिरो खस्न थालेपछि पशुचौपायालाई गोठबाट बाहिर निकाल्न ३५ वर्षीय बिष्णु थापा गोठमा छिरेका थिए ।

उनलाई पहिरोले च्याँप्दा घटनास्थलमै मृत्यु भएको प्रहरीले जानकारी दिएको छ । पहिरोले गोठमा रहेको एउटा पाडो र दुईवटा बाख्रा समेत च्यापिएर मरेका प्रहरीले जनाएको छ । उक्त गोठ पक्की पिल्लरसहित २ तले थियो ।