अछामको ढकारीमा दुई किशोरी मृत अवस्थामा फेला

काठमाडौँ- अछाम जिल्लाको ढकारी गाउँपालिका–८ पल्साता गाउँमा बाख्रा चराउन गएका दुई किशोरी मृत अवस्थामा फेला परेका छन्। मृतकहरू १४ वर्षीया ईश्वरी खड्का र १५ वर्षीया सरस्वती खड्का हुन्, जो एउटै परिवारका दिदीबहिनी हुन्।

किशोरीहरू शुक्रबार बाख्रा चराउन गएका थिए। शनिबार अपराह्न दुबैको शव अन्दाजी १५–१६ मिटरको दूरीमा भेटिएको छ। घटना स्थलको माथि ठुलो भीर रहेको र उनीहरू भीरबाट खसेका हुन सक्ने प्रारम्भिक अनुमान गरिएको छ। जिल्ला प्रहरी कार्यालय अछामका डीएसपी ईश्वरी प्रसाद भण्डारीका अनुसार, दुबै किशोरीको शरीरमा चोटपटकका निसाना देखिएका छन्।

घटना शंकास्पद भएकाले प्रहरी अनुसन्धान तीव्र पारिएको छ। घटनाको वास्तविकता पत्ता लगाउन तालिमप्राप्त कुकुर मगाइएको छ। प्रारम्भिक अनुसन्धानले भीरबाट खसेको अनुमान गरे पनि यो घटनाको सत्यता विस्तृत छानबिनपछि मात्र खुल्ने बताइएको छ। मृतक किशोरीहरू कमलबजार नगरपालिका–१० स्थित विद्या प्रवर्दनी माध्यमिक विद्यालयमा कक्षा आठमा अध्ययनरत थिए।

घटनास्थलको प्रकृति र चोटपटकका कारणले स्थानीयवासीले घटना शंकास्पद भएको बताउँदै न्याय र सत्यताका लागि उचित छानबिनको माग गरेका छन्।