काठमाडौं । अमेरिकी राष्ट्रपति डोनाल्ड ट्रम्पले भारत र पाकिस्तानबीचको सैन्य द्वन्द्व रोक्न दुवै देशमाथि २५० प्रतिशत भन्सार शुल्क लगाउने धम्की दिएको दाबी पुनः दोहोर्याएका छन्। व्यापारिक दबाबका कारण आफूले दुई देशबीच युद्धविराम गराउन भूमिका खेलेको उनको भनाइ छ।
टेक्सासको कर्पस क्रिस्टीमा बुधबार आयोजित चुनावी सभामा ट्रम्पले आफूले अन्त्य गरेको दाबी गरेका आठवटा युद्धमध्ये पाँचवटा व्यापारिक दबाब प्रयोग गरेर समाधान गरेको बताए।
उनका अनुसार भारत र पाकिस्तानका प्रधानमन्त्रीलाई युद्ध जारी राखे अमेरिकासँग व्यापार गर्न नदिने चेतावनी दिइएको थियो। त्यसपछि दुवै देश युद्धविरामका लागि तयार भएको उनको दाबी छ।
ट्रम्पले पाकिस्तानका प्रधानमन्त्री शाहबाज सरिफले आफूले कम्तीमा तीन करोड मानिसको ज्यान बचाएको बताएको पनि उल्लेख गरे। यद्यपि, युद्धविराम गराउन आफ्नो भूमिका रहेको ट्रम्पको दाबीलाई भारतले अस्वीकार गर्दै आएको छ।
भारतका अनुसार द्वन्द्व अन्त्य गर्ने सहमति बाह्य मध्यस्थताबाट नभई भारत र पाकिस्तानका सैन्य अधिकारीबीच भएको प्रत्यक्ष संवादपछि भएको थियो। भारतको भनाइमा पाकिस्तानका सैन्य कारबाहीका महानिर्देशकले भारतीय समकक्षीसँग सम्पर्क गरेपछि युद्धविरामको प्रक्रिया अघि बढेको थियो।
भारतले पहलगाममा अप्रिल २२ मा भएको आतङ्कवादी हमलाको जवाफमा मे ७ मा ‘अपरेसन सिन्दूर’ सुरु गरेको थियो। त्यसपछि मे १० मा सैन्य कारबाही रोकिएको भारतको भनाइ छ।
यसैबीच, ट्रम्पले आफूले आठवटा युद्ध समाधान गरेकाले नोबेल शान्ति पुरस्कार पाउन योग्य रहेको दाबी गर्दै आएका छन्। सन् २०२६ को नोबेल शान्ति पुरस्कार दक्षिण अफ्रिकी न्यायविद् नवी पिल्लेलाई दिने घोषणा भएपछि उनले पुरस्कार छनोटको आलोचना गरेको समाचारमा उल्लेख छ।
भारत–पाकिस्तान द्वन्द्व अन्त्यमा आफ्नो भूमिकाबारे ट्रम्पले बारम्बार दाबी गर्दै आए पनि भारतले भने बाह्य मध्यस्थताको भूमिका रहेको स्वीकार गरेको छैन। यस विषयमा दुवै पक्षका भनाइ फरक रहेका छन्।
प्रतिक्रिया