काठमाडौं l सर्वोच्च अदालतको प्रधानन्यायाधीश पदका लागि सिफारिस भएका डा. मनोज कुमार शर्मामाथि संसदीय सुनुवाइ प्रक्रिया सुरु भएको छ। सुनुवाइ प्रक्रियाअन्तर्गत संसदीय समितिले सार्वजनिक रूपमा उजुरी आह्वान गरेको थियो, जसअनुसार उनीविरुद्ध १६ वटा उजुरी दर्ता भएको जानकारी सार्वजनिक गरिएको छ।
अब संसदीय सुनुवाइ समितिले दर्ता भएका उजुरीहरू, डा. शर्माको योग्यता, कार्यसम्पादन तथा सम्बन्धित विषयमा उनको जवाफसमेतका आधारमा सुनुवाइ प्रक्रिया अगाडि बढाउनेछ। समितिबाट अनुमोदन भएपछि मात्र उनको नाम नियुक्तिका लागि राष्ट्रपतिसमक्ष पठाइने संवैधानिक प्रक्रिया अघि बढ्नेछ।
डा. शर्मा यसअघि सर्वोच्च अदालतका न्यायाधीशका रूपमा कार्यरत थिए। उनको सिफारिस न्यायिक क्षेत्रभित्र चर्चाको विषय बनेको छ, किनकि उनी वरिष्ठतम् न्यायाधीश नभई वरियताक्रममा चौथो स्थानमा रहेका न्यायाधीशमध्येबाट प्रधानन्यायाधीशका लागि सिफारिस भएका हुन्।
प्रतिक्रिया